अरविंद एज्युकेशन सोसायटीत फुटबॉल मिशनला प्रतिसाद

सांगवी : जागतिक फुटबॉल महासंघाची (फिफा) 17 वर्षाखालील स्पर्धा येत्या ऑक्टोबर महिन्यात भारतात होत आहे. या पार्श्वभूमीवर राज्यातील शालेय विद्यार्थ्यांमध्ये फुटबॉल खेळाविषयी आवड निर्माण व्हावी, या उद्देशाने ‘महाराष्ट्र फुटबॉल मिशन- वन मिलियन’ अंतर्गत जुनी सांगवीतील अरविंद एज्युकेशन सोसायटीच्या भारतीय विद्यानिकेतन विद्यालय व लिटल फ्लॉवर स्कूलमध्ये फुटबॉल स्पर्धेचे आयोजन करण्यात आले होते. ही स्पर्धा नवी सांगवीतील पीडब्ल्युडी मैदानावर घेण्यात आली.

यांची होती उपस्थिती
स्पर्धेच्या उद्घाटनप्रसंगी महापालिकेचे स्थायी समितीचे माजी अध्यक्ष अतूल शितोळे, दादा शितोळे प्रमुख पाहुणे म्हणून उपस्थित होते. संस्थेच्या अध्यक्षा आरती राव, उपाध्यक्ष प्रणव राव, मुख्याध्यापिका गीता येरूणकर, हर्षा बाठिया, तेजल कोळसे पाटील यांनीही उपस्थित राहून विद्यार्थ्यांना प्रोत्साहित केले. स्पर्धेत 17 वर्षाखालील मुले-मुली सहभागी झाले होते. क्रीडाशिक्षक रामेश्वर हराळे, जीवन सोलंकी, भटू शिंदे, योगेश जैन यांनी मुलांना फुटबॉल खेळातील बारकावे सांगितले.

मुलांमध्ये खेळांविषयी आवड हवी
यावेळी बोलताना अतुल शितोळे म्हणाले की, लहान वयातच मुलांमध्ये खेळाची आवड निर्माण व्हायला हवी. पालकांनी मुलांना खेळण्यासाठी मैदानावर पाठवावे. मोबाईलच्या जगातून बाहेर येऊन मुलांनीही मैदानावर घाम गाळावा. अधिकाधिक मुलांना फुटबॉलची आवड निर्माण व्हावी आणि खेळाडूंनी विविध स्पर्धांमध्ये आपल्या शहराचे, राज्याचे, देशाचे नाव उंचवावे, असे आवाहन शितोळे यांनी केले.