अरूणजी, बुलेट ट्रेनला हिंदीत काय म्हणतात?

नवी दिल्ली : अरूणजी, बुलेट ट्रेनला हिंदीमध्ये काय म्हणतात? असा प्रश्‍न एका श्रोत्याने केंद्रीय अर्थमंत्री अरूण जेटली यांचे भाषण सुरू असताना अचानक विचारल्याने जेटली भडकले. त्यांनी प्रश्न विचारणार्‍याला फैलावर घेत जरा गंभीर होण्याचा सल्ला दिला. शिवाय, मी तुम्हाला ओळखले आहे असे म्हणत त्यास दरडावण्याचाही प्रयत्न जेटलींनी केला. मात्र, नंतर या प्रकाराची चांगलीच चर्चा रंगली होती.

कृपया, गंभीर व्हा
अर्थमंत्री अरूण जेटली एका परिषदेत बुलेट ट्रेन प्रकल्पावर व्याख्यान देत होते. यावेळी त्यांनी माध्यमांवर टिप्पणी करत कमी माहिती असलेले लोक याविषयावर नाहक वाद घालत असल्याचे ते म्हणाले. त्याचवेळी समोर बसलेल्या एका व्यक्तीने अचानक अरूणजी, बुलेट ट्रेनला हिंदीमध्ये काय म्हणतात ? हिंदीमध्ये सांगा इंग्रजीमध्ये नको, असा प्रश्‍न विचारला. या प्रश्नामुळे जेटली थोडे अस्वस्थ झाले. मात्र, त्यांनी लगेच प्रश्न विचारणार्‍याला फटकारले. कृपया, गंभीर व्हा. तुम्हाला एकदा पाहिले आहे. गंभीर होण्याचा प्रयत्न करा, असा सल्ला त्यांनी दिला व आपले भाषण पुढे सुरू ठेवले. जेटली हे बोलत असताना प्रश्न विचारणार्‍याने मी विचारलेला प्रश्न हा गंभीरच आहे, हे सांगण्याचाही नंतर प्रयत्न केला.

सोशल मीडियावरही चर्चा
गेल्या आठवड्यात पंतप्रधान नरेंद्र मोदी आणि जपानचे पंतप्रधान शिंजो आबे यांनी अहमदाबादमध्ये देशातील पहिली बुलेट ट्रेनचे भूमीपूजन केले. त्यानंतर देशात बुलेट ट्रेनवरून सोशल मीडिया व माध्यमांमध्ये चर्चा रंगल्या आहेत. अनेकांनी बुलेट ट्रेनवरून सरकारला धारेवरही धरले आहे. त्यातच अरूण जेटली यांना एका श्रोत्याने बुलेट ट्रेनवरून प्रश्‍न विचारल्याने त्याचे खुमासदार पडसाद सोशल मीडियावर तात्काळ उमटू लागले होते.