अल्पवयीन मुलीने २३ व्या मजल्यावरून उडी मारून केली आत्महत्या

मुंबई : एका अल्पवयीन मुलीने २३ व्या मजल्यावरून उडी मारून आत्महत्या केल्याची घटना घडली आहे. शुक्रवारी मध्यरात्री २ ते 3 वाजण्याच्या दरम्यान प्रियंका आमरिष कोठारी (वय 16 ) या अल्पवयीन मुलीने राहत्या घराच्या खिडकीतून खाली उडी मारून आत्महत्या केली. ही घटना ताडदेव येथील इम्पिरियल टॉवरमध्ये घडली आहे. या टॉवरमध्ये २३ व्या मजल्यावर रूम नं. 2308 मध्ये कोठारी कुटुंबीय राहतात. काल मध्यरात्री प्रियंकाने याच रूमच्या खिडकीतून खाली उडी मारून जीवन संपवलं. या घटनेमागे नेमकं काय कारण आहे याचा ताडदेव पोलीस तपास करत आहेत. मुलीला नायर रुग्णालय येथे नेले असता तेथील डॉक्टरांनी तिला मृत  घोषित केले. याबाबत ताडदेव पोलिसांनी आकस्मित मृत्यूची नोंद  केली असून याचा अधिक तपास करत आहेत.

मृत मुलगी हिल स्प्रिंग इंटरनॅशनल शाळेत शिकत होती. मृत प्रियंकाच्या वडिलांचा ज्वेलरीचा व्यवसाय असून काल ते नवी दिल्लीत कामानिमित्त गेले होते. प्रियंकाला एक लहान ६ वर्षाचा भाऊ आहे. घटनास्थळी अथवा घरात सुसाईट नोट सापडली नसून नेमकं या आत्महत्येमागील कारणाचा पोलीस शोध घेत आहेत.