अवैधरित्या गुटख्याची विक्री करणार्‍यां दोघांना केले गजाआड; दोन मोटर आणि 4 लाखांचा गुटखा जप्त
महाराष्ट्र सरकारकडून गुटख्यावर बंदी आणलेली असतानाही अनेक ठिकाणी छुप्या पद्धतीने गुटख्याची विक्री सुरू
पिंपरी चिंचवड गुन्हे शाखेच्या अंमली पदार्थ विरोधी पथकाची कारवाई
भोसरी : महाराष्ट्र सरकारकडून गुटख्यावर बंदी आणलेली असतानाही अनेक ठिकाणी छुप्या पद्धतीने गुटख्याची विक्री सुरू आहे. गेल्या काही महिन्यात अनेकदा गुटखा पकडल्याचे दिसून येत आहे. छोट्या टपर्‍यांमधून आणि पानपट्टीवर छुप्या पद्धतीने गुटखा विक्री सुरू आहे. कालही अवैधरित्या गुटख्याची वाहतूक करणार्‍या दोघांना पिंपरी चिंचवड गुन्हे शाखेच्या अंमली पदार्थ विरोधी पथकाने अटक केली. त्यांच्याकडून दोन कार आणि गुटखा असा एकूण 4 लाख 87 हजार 126 रुपयांचा ऐवज जप्त केला आहे. ही कारवाई भोसरी येथील शांतीनगरमधील सार्वजनिक रोडवर करण्यात आली. सागर बालाजी वराळे (वय 24, रा. शांतीनगर, भोसरी), श्रवण मोहनलाल चौधरी (वय 34, रा. राजस्थान) अशी अटक करण्यात आलेल्या आरोपींची नावे आहेत. त्यामुळे छुप्या पद्धतीने चालणारी ही गुटखा विक्री हा मोठा बिकट प्रश्‍न झाला आहे.
पोलिसांकडून शहरात गस्त
पिंपरी-चिंचवड शहरात दिवसेंदिवस गुन्हेगारी वाढलेली असल्याचे दिसून येत आहे. त्यामुळे गुन्हेगारीवर नियंत्रण ठेवण्यासाठी पोलिसांकडून ठिकठिकाणी गस्त घातली जाते. रविवारी पिंपरी-चिंचवड गुन्हे शाखेच्या अंमली पदार्थ विरोधी पथक भोसरी परिसरात गस्त घालत होते. त्यावेळी पथकातील पोलीस हवालदार राजन महाडीक यांना शांतीनगरमधील सार्वजनिकरस्त्यावर दोनजण संशयितरित्या उभे असून त्यांच्याकडे गुटखा असल्याची माहिती मिळाली. पोलिसांनी याठिकाणी सापळा रचला असता दोनजण संशयितरित्या आढळून आले. त्यांच्याकडे असलेल्या नॅनो कार (एमएच 12, जेसी 7783) आणि सॅन्ट्रो (एमएच 12, एचएल 2842) गाडीची झडती घेतली असता कारमध्ये 2 लाख 37 हजार 126 रुपयाचा गुटखा आढळून आला. पोलिसांनी दोन कार आणि गुटखा असा एकूण 4 लाख 87 हजार 126 रुपयांचा मुद्देमाल जप्त करुन आरोपींना अटक केली.
यांच्या पथकाने केली कारवाई
अंमली पदार्थ विरोधी पथकाचे पोलीस निरीक्षक श्रीराम पौळ यांनी सांगितले की, चोरी-छुपे पद्धतीने अद्यापही गुटखा विक्री केली जात आहे. त्यामुळे वरचेवर टेम्पो किंवा असा मोठ्या किंमतीचा गुटखा जप्त केला जात आहे. या दोघांकडून माहिती घेऊन लवकरच बाकीच्या लोकांवर कारवाई करणार आहोत. ही कारवाई आयुक्त आर. के. पद्मनाभन, अप्पर आयुक्त मकरंद रानडे, सहायक आयुक्त सतीश पाटील यांच्या मार्गदर्शनाखाली पोलीस उप निरीक्षक वसंत मुळे, प्रशांत महाले, पोलीस कर्मचारी राजन महाडीक, प्रदीप शेलार, बाळासाहेब सूर्यवंशी, रमेश भिसे, राजेंद्र बांबळे, दिनकर भुजबळ यांच्या पथकाने ही कारवाई केली.