अ‍ॅपे रीक्षातून पडल्याने यावलच्या विवाहितेचा मृत्यू

अपघातांची मालिका थांबेना ; पोलिसांकडून कारवाईला बग

यावल- अ‍ॅपे रीक्षा अपघातांची मालिका यावल तालुक्यात थांबायला तयार नाही. आठवडाभरात दोन अपघातात चौघांचा बळी गेल्यानंतर गुरुवारीदेखील धावत्या धावत्या अ‍ॅपे रीक्षातून पडल्याने विवाहितेचा मृत्यू झाल्याची घटना गुरूवारी दुपारी अडीच वाजेच्या सुमारात कोळवद-यावल रस्त्यावर घडली. या घटनेत आरेफा रसुल तडवी (38, रा.कोळवद, हल्ली मुक्काम तडवी कॉलनी, यावल) असे मृत विवाहितेचे नाव आहे.

भोवळ आल्याने विवाहिता कोसळली रस्त्यावर
आरेफा या आपल्या कुटुंबियांसोबत कोळवद येथून गिरडगाव येथील नातेवाईकाकडे कार्यक्रमाला गेल्या होत्या. कार्यक्रम आटोपून त्या दुपारी शेखर भागवत सपकाळे (रा.कोळवद) यांच्या अ‍ॅपेरीक्षा (एम.एच.19 व्ही.7038) मधून निघाल्या होत्या परंतु कोळवद-यावल रस्त्यावर धावत्या रीक्षात आरेफा यांना भोवळ आली आणि त्या थेट रस्त्यावर कोसळल्या. त्यात त्यांच्या डोक्याला गंभीर दुखापत झाली. रीक्षा चालक आणि नातेवाईकांनी त्यांना तातडीने यावल येथील ग्रामीण रुग्णालयात हलवले परंतु डॉक्टरांनी त्यांची तपासणी करून आरेफा यांना मृत घोषित केले. घटनेची माहिती मिळताच पोलीस उपनिरीक्षक सुनीता कोळपकर यांनी ग्रामीण रुग्णालयात भेट दिली. तडवी समाज बांधवांनी रूग्णालयात गर्दी केली होती.आरेफा यांचा मृत्यू झाल्याचे समजताच नातेवाइकांनी एकच आक्रोश केला. आरेफा यांच्या पश्चात पती, दोन मुले असा परीवार आहे.