आई फ्रुटी घेवून देण्यास उठली… अन् रेल्वेच्या खिडकीतून चिमुकला पडला बाहेर

खिडकीत बसणे चिमुकल्याच्या जीवावर बेतले : भादली रेल्वेस्थानकाजवळील घटना

जळगाव – रेल्वेच्या प्रवासात आपल्या साडेतीन वर्षाच्या चिमुकल्यासोबत आई रेल्वेच्या डब्यात आपातकालीन खिडकीजवळ बसली होती. चिमुकल्याने पिण्यासाठी फु्रटी घेवून देण्याचा आईकडे हट्ट धरला. आई फु्रटी घेवून देण्यासाठी बसल्याजागेवरुन पर्समधून पैसे काढण्यासाठी उठताच, चिमकुला धावत्या रेल्वेत उघड्या आपातकालीन खिडकीतून बाहेर पडल्याने गंभीर झाल्याची घटना शुक्रवारी दुपारी 3 वाजता भादली रेल्वेस्थानकाजवळ घडली. विनायक शिवकुमार गुप्ता रा. बोरीवली, मुंबई असे जखमी चिमुकल्याचे नाव आहे. घटनेत मेंदूत रक्तश्राव झाला असून डाव्या हाताचे हाड मोडले आहे. त्याच्यावर जिल्हा रुग्णालयात उपचार सुरु आहेत.

मामाच्या लग्नासाठी गेल्या होते गावी

मुंबई परिसरातील बोरीवली येथे शिवकुमार गुप्ता हे पत्नी पिंकी व मुलगा विनायक यांच्यासह वास्तव्यास आहे. पिंकी गुप्ता यांच्या भावाचा 16 रोजी उत्तरप्रदेशातील मूळ गावी कटहरी हिराकत जि.जौनपूर येथे लग्नसमारंभ होता. या लग्नसमारंभासाठी पिंकी ह्या चिमुकला विनायक याच्यासह गेल्या होत्या. लग्नसोहळा आटोपून भाऊ सुरज गुप्ता याच्यासोबत त्या पुन्हा बोरीवलीकडे जाण्यासाठी मंडू आहीह- छत्रपती लोकमान्य टर्मीनल या एक्स्प्रेसमध्ये आपातकालीन खिडकीजवळ बसल्या. रेल्वे गाडीने भुसावळ स्टेशन सोडले. यादरम्यान गाडीत विनायकने गाडीत फ्रुटी पिण्यासाठी मागितली. ती घेवून देण्यासाठी विनायकला आपातकालीन खिडकीजवळ उभा सोडून आई पिंकी उठली. पर्समध्ये पैसे घेत असतांनाच उघड्यात आपातकालीन खिडकीतून विनायक हा बाहेर पडला.

चैन पुलींग करुन प्रवाशांनी थांबविली गाडी

डोळ्यासमोर घडलेल्या घटनेनंतर आई पिंकी यांनी आरडाओरड करत एकच हंबरडा फोडला. सोबतच्या प्रवाशांनी प्रकार लक्षात आल्यावर तत्काळ चैन पुलींग करुन गाडी थांबवली. पिंकी भाऊ सुरजसोबत गाडीखाली उतरल्या. विनायक पडल्या दिशेने धावत सुठल्या. पडल्यावर जोरदार मार बसल्याने विनायक बेशुध्द पडला होता. त्याला  उचलले. यानंतर पुन्हा रेल्वेत बसल्या. जळगाव स्थानकावर रेल्वे पोहचण्यापूर्वी स्टेशन मास्तर यांनी लोहमार्ग पोलिसांना खबर दिली होती. त्यानुसार गाडी रेल्वेस्थानक ावर पोहचताच लोहमार्ग पोलीस ठाण्याचे पोलीस हवालदार राकेश पांण्डेय, पोलीस शिपाई अजय मून यांनी जखमी बालकास रुग्णवाहिकेतून जिल्हा रुग्णालयात हलविले.

गंभीर चिमुकल्याला मुंबईकडे हलविले

दुर्देवी घटनेत विनायकच्या डोक्याला गंभीर दुखापत झाली असून उजवा हात मोडला आहे. त्याच्यावर प्राथमिक उपचार तसेच सिटीस्कॅन तपासणी करण्यात आली. यात मेंदूत रक्तश्राव झाला असल्याचे निदान झाले. त्यानुसार पुढील उपचारार्थ त्याला मुंबईकडे हलविण्यात आले होते. लोहमार्ग पोलीस राकेश पांण्डेय यांनी रुग्णवाहिका करुन देत तसेच चिमुकल्याचे वडील शिवकुमार गुप्ता यांच्याशी फोनवरुन संपर्क साधत जखमीला मुंबईकडे रवाना केल्याची माहिती मिळाली आहे. याप्रकरणी लोहमार्ग पोलिसात नोंद करण्यात आली आहे. रेल्वेतून प्रवास करणार्‍या पालकांनी आपल्या पाल्यास खिडकीजवळ बसविणेे टाळले पाहिजे, नाहीतर आपल्यासोबतही ही दुर्देवी घटना घडण्याची शक्यता नाकारता येत नाही, असे या घटनेतून समोर आले आहे.