आघाडीने पीआरपीला विधानसभेची जागा दिल्यानंतरच लोकसभेचा प्रचार

जगन सोनवणे यांनी पत्रकार परीषदेत मांडली भूमिका ; लेखी आश्‍वासनाशिवाय प्रचार नाही

भुसावळ- आगामी विधानसभा निवडणुकीत भुसावळची जागा पीआरपीला काँग्रेस-राष्ट्रवादी आघाडीने द्यावी अन्यथा लोकसभेच्या निवडणुकीत काँग्रेस-राष्ट्रवादी काँग्रेस आघाडी उमेदवाराच्या जळगाव आणि रावेर येथे होणार्‍या प्रचार सभेत व्यासपीठावरसुद्धा चढणार नाही तसेच प्रचारही करणार नाही, अशी ठाम भूमिका पीआरपीचे प्रदेश महामंत्री जगन सोनवणे यांनी येथे मांडली. रविवारी पीआरपीच्या संपर्क कार्यालयात झालेल्या पदाधिकार्‍यांच्या बैठकीत हा निर्णय घेण्यात आल्याचे रविवारी सोनवणे यांनी सांगत लेखी आश्‍वासन मिळत नाही तोपर्यंत आमची भूमिका ठाम असणार असल्याची भूमिकाही मांडली.

प्रभावी भाषणासाठी आमची आठवण
जगन सोनवणे पुढे म्हणाले की, गत काळात राष्ट्रवादी काँग्रेसच्या स्थापनेपासून संस्थापक अध्यक्ष शरद पवार, अजित पवार यांच्या नेतृत्वावर विश्‍वास ठेवून त्यांच्या सोबत ग्रामपंचायत ते लोकसभेच्या प्रत्येक निवडणुकीत पीआरपी सोबत राहिली आहे मात्र जिल्ह्यात गतकाळात विधानसभा असो की, लोकसभा या निवडणुकीत प्रभावी भाषण आणि सभा गाजवण्यासाठी पीआरपीचे प्रदेश महामंत्री जगन सोनवणेंची आठवण राष्ट्रवादी काँग्रेसच्या नेत्यांना येते परंतु मागील पाच वर्षात जिल्ह्यात कष्टकरी, मुस्लीम, दलित व बहुजन समाजबांधवांवर होणार्‍या अन्यायाला पीआरपीने विविध आंदोलनाच्या माध्यमातून वाचा फोडली असून पीआरपी कार्यकर्त्यांच्या मागणीनुसार भुसावळ विधानसभेची जागा ही पीआरपीला सोडण्यात यावी, अशी आमची ठाम भूमिका आहे. अन्यथा लोकसभेत जळगाव आणि रावेर येथील राष्ट्रवादीच्या उमेदवारांच्या प्रचारसभेत आणि व्यासपीठावर आम्ही दिसणार नाही, असेही सोनवणे यांनी सांगितले. पीपल्स रीपब्लीकन पार्टीचे प्रा.जोगेंद्र कवाडे यांच्याशी बोलून आम्ही हा निर्णय घेतल्याचेही सोनवणे यांनी सांगितले. या पत्रकार परीषदेला पीआरपी युवा जिल्हाप्रमुख राकेश बग्गन, ग्रामीण जिल्हाप्रमुख संतोष मेश्राम, राष्ट्रीय मजदूर सेना जिल्हाप्रमुख राजू डोंगरदिवे, मुस्लीम धर्मगुरु मौलाना, हरीश सुरवाडे, माई ब्रिगेड जिल्हाप्रमुख संगीता ब्राह्मणे आदींची उपस्थिती होती.