आजपासून ‘फ्रेंच’चा फिव्हर

पॅरिस । टेनिसमधील जागतिक स्तरावर महत्वाची मानली जाणारी मानाची फ्रेंच ओपन रविवारपासून सुरू होत आहे. फ्रेंच ग्रँडस्लॅम टेनिस स्पर्धेचा ड्रॉ जाहीर करण्यात आला असून विद्यमान विजेती गार्बिन मुगुरुझा व 2010 ची फ्रेंच ओपन विजेती फ्रान्सेस्का शियाव्होन यांच्यात सलामीची लढत होणार आहे तर जागतिक द्वितीय मानांकित व या स्पर्धेत दुसरे मानांकन मिळालेल्या ज्योकोव्हिक सोबत 76 व्या मानांकित स्पेनच्या मार्सेल ग्रॅनोलर्सशी सलामीची लढत होणार आहेत. या स्पर्धेत सेरेना विल्यम्स गर्भवती असल्याने खेळू शकणार नाही.

महिलांमधील निकाल अनपेक्षित होण्याची शक्यता
महिलांमध्ये गार्बिन मुगुरुझा व फ्रान्सची शियाव्होन यांच्यात सलामीची लढत होईल. पहिल्या फेरीच्या अन्य सामन्यात जागतिक अग्रमानांकित अँजेलिक केर्बर व एकतेरिना माकारोव्हा, सिमोना हॅलेप व स्लोव्हाकियाची याना सेपेलोव्हा अशा लढती होतील. गेल्या डिसेंबरमध्ये चोराने केलेल्या चाकुहल्ल्यात जखमी झालेली झेकची पेत्र क्विटोव्हा पूर्ण तंदुरुस्त झाली असून तिचा मुख्य ड्रॉमध्ये समावेश करण्यात आला आहे. 27 वषीय क्विटोव्हाला 15 वे मानांकन मिळाले असून तिची पहिली लढत अमेरिकेच्या ज्युलिया बोसरपशी होईल. सेरेना व मारिया या स्पर्धेत खेळणार नसल्याने महिलांमध्ये कोणीही जिंकू शकेल, अशी स्थिती आहे.

मरेची कामगिरी निराशाजनक
काही चमत्कार न घडल्यास आणि अपेक्षेनुसार खेळ झाल्यास सर्बियाचा नोव्हॅक ज्योकोव्हिक व स्पेनचा राफेल नादाल यांच्यात उपांत्य फेरीत गाठ पडण्याची शक्यता आहे. जागतिक अग्रमानांकित अँडी मरेची या मोसमात क्लेकोर्टवरील कामगिरी निराशाजनक झाली असून त्याची सलामी रशियाच्या आंद्रे कुझनेत्सोव्हशी होणार आहे. स्वित्झर्लंडच्या तिसर्‍या मानांकित स्टॅनिसलास वावरिंकाची पहिली लढत पात्रता फेरीतून आलेल्या खेळाडूंशी होईल आणि कदाचित उपांत्य फेरीत त्याला मरेशी मुकाबला करावा लागू शकतो. नऊ वेळा फ्रेंच स्पर्धा जिंकलेल्या नादालला पहिल्या फेरीत फ्रान्सच्या बेनोई पेअरशी मुकाबला करावा लागणार आहे.

नादालची जबरदस्त कामगिरी
नादालने क्लेकोर्टवर जबरदस्त कामगिरी केली असून या मोसमात त्याने सलग 17 सामने जिंकले आहेत. ज्योकोव्हिकला मात्र फॉर्म व आत्मविश्वास यासाठी संघर्ष करावा लागला असून त्याने अमेरिकेचा माजी टेनिसपटू आंदे अगास्सीची प्रशिक्षक म्हणून नियुक्ती केली आहे. गेल्या वषी येथे त्याने करिअर ग्रँडस्लॅम पूर्ण केल्यानंतर त्याच्या फॉर्मला घसरण लागली आहे. विम्बल्डनमध्ये त्याला तिसर्‍या फेरीत तर रिओ ऑलिम्पिकमध्ये पहिल्याच फेरीत तो पराभूत झाला होता. त्यानंतर अमेरिकन ओपनची अंतिम फेरी गाठली आणि ऑस्ट्रेलियन ओपनमध्ये बाहेर पडावे लागले. गेल्या 11 पैकी फक्त एका स्पर्धेत जेतेपद मिळविता आले आहे. फेडररने ऑस्ट्रेलियन ओपन स्पर्धा जिंकली. पण ग्रास व हार्ड कोर्टच्या तयारीसाठी त्याने या स्पर्धेतून माघार घेतली आहे.