आजपासून मुंबई-कोल्हापूर विमानसेवा सुरू होणार

मुंबई । गेली सहा वर्षे रखडलेली कोल्हापूरची विमानसेवा आता उद्यापासून अर्थात मंगळवारपासून सुरू होणार आहे. मुंबई – कोल्हापूर आणि कोल्हापूर – मुंबई या विमानसेवेतून 30 प्रवासी उद्या उडान योजनेअंतर्गत प्रवास करणार आहेत. कोल्हापूरची विमानसेवा गेल्या 6 वर्षांपासून रखडली होती. अनेक वेळा या विमानसेवेच्या घोषणा झाल्या आणि त्या हवेतच विरल्या. मात्र कोल्हापूरचे खासदार धनंजय महाडिक यांनी या सेवेसाठी मोठा पाठपुरावा केला. त्यांच्या प्रयत्नातून पुन्हा कोल्हापूर – मुंबई ही विमानसेवा सुरू होत आहे.

शेतकरी, अनाथ आणि अपंग मुले, कचरा वेचक महिला प्रवास करणार
मुंबईतून उद्या दुपारी दोन वाजता विविध क्षेत्रांत काम करणारे मान्यवर या विमानातून कोल्हापूरला येतील, तर कोल्हापूरहून मुंबईला शेतकरी, अनाथ आणि अपंग मुले, कचरा वेचक महिला तसेच विविध क्षेत्रात काम करणार्‍या महिला प्रवास करतील. खासदार धनंजय महाडिक यांनी याबाबत नियोजन केले आहे. कोल्हापूरची विमानसेवा अखंडित रहावी यासाठी धनंजय महाडिक यांनी पुढील सहा महिन्यांची विमान तिकिटे घेण्याची तयारी दाखवली आहे.