आजपासून 11 दिवस गणेशोत्सवाची धूम!

पिंपरी-चिंचवड : रंगीबेरंगी फुलांची आकर्षक सजावट, सुगंधी धूप अगरबत्यांचा दरवळ, मंगलमयी वाद्यांची सुरावट आणि लक्ष वेधून घेणारी आरास अशा प्रसन्नशील चैतन्यदायी वातावरणात लाडक्या गणरायाचे गुरूवारी आगमन होणार आहे. त्याच्या स्वागतासाठी घरोघरी उत्साहाचे वातावरण असून संपूर्ण शहर सज्ज झाले आहे. प्रत्येकाला बाप्पांच्या प्राणप्रतिष्ठापनेचे वेध लागले आहेत. शहरातील प्रमुख मंडळाची तयारी पूर्ण झाली असून अनेकांकडून मंडप व सजावटीवर अखेरचा हात फिरविण्याचे काम सुरु होते. कार्यकर्त्यांनी उरलेल्या कामे पूर्णत्वाला नेण्याकरिता वेगाने काम सुरु केल्याचे दृश्य होते. दरम्यान, पूजासाहित्य व सजावट साहित्य खरेदीसाठी आबालवृद्धांची मोठी गर्दी बाजारपेठेत झाली होती.

बाजारपेठांमधील खरेदीसाठी गर्दी बुधवारी कायम होती. अनेकांनी वाहतूक कोंडी टाळण्याकरिता उत्सवाच्या आदल्यादिवशीच श्रींची मुर्ती घरी घेवून जाण्यास पसंती दिली. उत्सुकता, उत्साह, आतुरतेचे वातावरण उत्सवाच्या पूर्वेसंध्येला पाहवयास मिळाला. वादनाकरिता तयार असलेली ढोलपथके, लेझीमपथके, झांजपथके यांची तयारी पूर्ण होवून आता वादकांना गणरायाच्या स्वारीचे वेध लागले आहेत. सुख, शांती,समृध्दी आणि मांगल्याचे प्रतिक असलेल्या विघ्नहर्ता श्रीगणेशाचे गुरूवारी भाद्रपद शुद्ध चतुर्थीला म्हणजेच गणेश चतुर्थी आगमन होत आहे. गणरायाच्या स्वागतासाठी अवघी औद्योगिक नगरी सज्ज झाली असून, घरोघरी व गणेशमंडळांच्या सजावटीच्या तयारीने वेग घेतला आहे. यंदाचा गणेशोत्सव हा अकरा दिवसांचा आहे. गणेश चतुर्थीला पहाटे ब्राह्म मुहूर्तापासून दुपारी दीड वाजेपर्यंत श्रीगणेशाच्या प्राणप्रतिष्ठापनेसाठी उत्तम मुहूर्त असल्याची माहिती पंचांगकर्ते मोहन दाते यांनी दिली.

गणेशोत्सवाच्या पहिल्या दिवशी घरोघरी आणि सार्वजनिक मंडळांकडून पार्थिव गणेश मूर्तीची स्थापना व पूजन केले जाणार आहे. या दिवशी सूर्योदयापासून दुपारी 2:52 पर्यंत भद्रा आहे. श्रीगणेश स्थापनेसाठी भद्रा दोष मानू नये. पहाटेपासून ते दीड वाजेपर्यंत आपल्या आणि गुरूजींच्या सोयीनुसार कोणत्याही वेळी मंगलमूर्ती मोरया… च्या जयघोषात घरातील श्रीगणेशाची स्थापना करून पूजन करावे. आपल्या घरी जितके दिवस उत्सव असेल तितके दिवस सकाळी पूजा व रात्री आरती मंत्रपुष्प केल्याने घरामध्ये प्रसन्नता येते, घरातील मूर्ती सुमारे एक वीत म्हणजे 7/8 इंच उंचीची असावी, ही मूर्ती आसनस्थ आणि सुबक असावी तसेच मातीची अथवा शाडूची असावी, असे दाते म्हणाले.