आज युतीबाबत घोषणा होणार; दिल्लीत भाजपची बैठक !

नवी दिल्ली: महाराष्ट्र विधानसभा निवडणुकीसाठी भाजप-सेनेच्या युतीबाबत अद्याप निर्णय झालेला नाही. दरम्यान आज नवी दिल्लीत भाजपच्या केंद्रीय निवडणूक समितीची बैठक होत आहे. त्यात युतीच्या जागावाटपावर शिक्कामोर्तब होण्याची शक्यता व्यक्त केली जात आहे. या बैठकीनंतर कदाचित भाजपच्या उमेदवारांची पहिली यादी जाहीर होऊ शकते असे सांगण्यात येत आहे. या बैठकीला पंतप्रधान नरेंद्र मोदी, भाजपचे अध्यक्ष अमित शहा, कार्यकारी अध्यक्ष जे.पी. नड्डा आणि अन्य वरिष्ठ नेते उपस्थित असणार आहेत. राज्याचे मुख्यमंत्री देवेंद्र फडणवीस, चंद्रकांत पाटील, सुधीर मुनगंटीवार आदी नेतेही उपस्थित राहणार आहेत.

राज्यात विधानसभा निवडणुकीचे वारे जोरात आहे. उमेदवारी अर्ज भरण्यास सुरुवात झाली आहे. मात्र, अद्याप भाजप-शिवसेना युती जागावाटपावर अडलेली आहे. दिल्लीत आज भाजपच्या केंद्रीय निवडणूक समितीची बैठक होणार असून यात यावर शिक्कामोर्तब होणार आहे.