आज संविधान सन्मान रॅली

पुणे । संविधान सन्मान समितीच्यावतीने संविधान दिनाचे औचित्य साधून रविवारी (दि.26) काढण्यात येणार्‍या संविधान सन्मान रॅली’ची तयारी अंतिम टप्प्यात पोहोचली आहे. मार्गांची रचना, स्वच्छता, रॅलीत सहभागी होणार्‍यांसाठी सोई-सुविधा, संविधान रथ, पार्कींगपासून ते रॅलीच्या कार्यक्रमाचे स्वरुप अशा सर्व कामांची माहिती घेऊन समितीच्या पदाधिकार्‍यांनी शुक्रवारी पाहणी केली.यासाठी राजकीय, सामाजिक, सांस्कृतिक अशा वेगवेगळ्या क्षेत्रातील नागरीकांनी एकत्रीत येऊन संविधान सन्मान समिती या अराजकीय व्यासपीठाची निर्मिती केली. यामार्फत मागील एक महिन्यापासून संविधान सन्मान समितीच्यावतीने संविधान सन्मान रॅलीची तयारी सुरू होती.

रॅलीचे कार्यक्रमाचे स्वरूप
रविवारी सकाळी दहा वाजता महापौर मुक्ता टिळक व लहान मुलांच्या हस्ते महात्मा फुले वाड्यातील सावित्रीबाई फुले व महात्मा फुले यांच्या पुतळ्यास पुष्पहार अर्पण करण्यात येईल. संविधानाच्या उद्देशिकेचे वाचन झाल्यानंतर रॅलीस प्रारंभ होईल. त्याप्रारंभी युवती-महिला, विद्यार्थी, पुरूष व अखेरीस कार्यकर्ते या पद्धतीने रॅलीमध्ये सहभागी होतील. जिल्हाधिकारी कार्यालयासमोरील डॉ.बाबासहेब आंबेडकर पुतळ्यासमोर रॅलीचा समारोप होईल.

रॅलीचा मार्ग
महात्मा फुले वाडा येथुन सकाळी दहा वाजता प्रारंभ. नेहरू रस्ता, रामोशी गेट पोलिस चौकी, ए.डी.कॅम्प चौक-संत कबीर चौक, जिल्हा परिषद इमारतीसमोरुन जिल्हाधिकारी कार्यालयासमोरील डॉ.बाबासाहेब आंबेडकर यांच्या पुतळ्यासमोर समारोप.

पार्कींगची सुविधा
दुचाकी वाहने – गंज पेठेतील सावित्रीबाई फुले सांस्कृतिक भवन, रामोशी गेट येथील सावित्रीबाई फुले शाळा, मोहम्मद किडवई शाळा. चारचाकी वाहने – डॉ.बाबासाहब आंबेडकर हायस्कुल (अहिल्याश्रम), क्वार्टर गेट, नाना पेठ.

संविधान सन्मान रॅलीची वैशिष्ट्ये
प्रमुख आकर्षण संविधान रथ देशातील सर्वसामान्य नागरीकाला संविधानामुळे बळ मिळाले. म्हणुनच स्वातंत्र्य, समता, बंधुता, न्याय यांसारखी संविधानाची मुलतत्वांची माहिती या रथाद्वारे देण्यात येणार आहे. रथावर राष्ट्रचिन्ह असलेले सिंहाचे चित्र असेल. याबरोबरच संविधानाची उद्देशिकाही असेल. संविधान दिनाची वैशिष्ट्ये सांगणारी चित्रे या रथावर असतील. याबरोबरच तत्कालीन राष्ट्रपती राजेंद्रप्रसाद यांच्याकडे संविधान सुपुर्द करताना डॉ.बाबासाहेब आंबेडकर यांची छायाचित्रांनी हा रथ सजविलेला असणार आहे. तर रथाच्या मध्यभागी तिरंगी ध्वज असेल.

उत्कृष्ट संगीत, गायन व शब्दरचना
संविधान रॅलीसाठी गाणं : वुई द पिपल ऑफ डेमोक्रेटिक इंडिया’ या शब्दांनी सुरू होणारे सुंदर गीत खास संविधान सन्मान रॅलीसाठी तयार करण्यात आले आहे. उत्कृष्ट संगीत, गायन व शब्दरचना, अशा वैशिषाट्यांमुळे हे गाणे मोबाईलमध्ये काही दिवसांपासुन वाजू लागले आहे. विशेषतः तरूणांना याने वेड लावले आहे.
सर्वधर्मीय धर्मगुरुंचाही सहभाग : संविधान सन्मान रॅलीमध्ये सर्व धर्मांच्या धर्मगुरूंनीही सहभागी व्हावे, यासाठी समितीने प्रयत्न केला आहे. त्यादृष्टीने शहरातील सर्व धर्मांच्या धर्मगुरूंना समितीने विशेष आमंत्रण दिले आहे. त्यामुळे या रॅलीमध्ये सर्वधर्मीय धर्मगुरूंचा महत्वपुर्ण सहभाग असणार आहे.