आणखीही एक व्हॉट्सअ‍ॅप हॅक; तरुणीच्या तीन मित्रांना गंडवले!
पुणे : वॉटस्अ‍ॅप हॅक करून लुटण्याचा प्रकार मुंबईत उघडकीस आला होता. आता आणखी एक प्रकार पुण्यात घडला आहे. अनोखळी व्यक्तीकडून व्हॉट्सअ‍ॅपवर आलेली लिंक उघडणे आणि कुणाला ती लिंक पाठवणे हा प्रकार पुण्यातल्या तरूणीला महागात पडला आहे. तसे करून तिचे व्हॉट्सअ‍ॅप हॅक करून तिच्या मित्रांना गंडवण्यात आले आहे.
‘पेटीएम’ अकाउंटवर पैसे मागून फसवणूक
हॅकरने तरुणीच्या नावाने ‘पेटीएम’ अकाउंटवर पैसे मागून फसवणूक केल्याची घटना समोर आली आहे. पुण्यातील एका कॉलेजमध्ये शिकणार्‍या तरुणीला व्हॉट्सअ‍ॅपवर अनोळखी व्यक्तीकडून मेसेज आला. त्या मेसेजमध्ये असलेली लिंक परत त्याच क्रमांकावर पाठविण्यात यावी. असे त्या मेसेजमध्ये म्हटले होते. तरुणीनेदेखील लिंक परत त्या क्रमांकावर पाठविली. त्यानंतर हॅकरने तिचे व्हॉट्सअ‍ॅप अकाउंट हॅक केले. त्यानंतर तिची कॉन्टॅक्ट लिस्ट त्याने चोरली. त्या लिस्टमधील तीन व्यक्तीशी त्याने व्हॉट्सअ‍ॅपवरून संपर्क साधला. त्यानंतर आपण तीच तरुणी असल्याचे हॅकरने त्यांना भासवले. त्या तिनही व्यक्तींकडे पैशाची गरज असल्याचे सांगत हॅकरने पेटीएमच्या अकाउंटवर पैशाची मागणी केली. अशा पद्धतीने तुम्हाला मेसेज आल्यास त्याची खात्री तुमच्या मित्र-मैत्रिणींकडून करून घ्या आणि त्यानंतरच पैसे पाठवा. असे आवाहन सायबर सेलकडून करण्यात आले आहे.
सायबर सेलकडे तक्रार
दोन व्यक्तींनी प्रत्येकी पाच व एकाने चार हजार रुपये सांगितलेल्या पेटीएम अकाउंटवर पाठविले. मात्र, त्यानंतर तरुणीशी संपर्क साधला असता तिने अशा प्रकारचे पैसे मागितले नसल्याचे सांगितले. त्यानंतर हा संपूर्ण प्रकार उघडकीस आला. याप्रकरणी तरुणीने सायबर सेलकडे तक्रार केली आहे.