आता पुणे-नाशिक मार्गावर धावणार फक्त ‘शिवशाही’

पुणे । पुणे-नाशिक मार्गावर प्रवाशांना आता शिवनेरी बसची सेवा मिळू शकणार नाही. कारण या मार्गावरील शिवनेरी आणि हिरकणी या दोन्ही प्रकारातील बस बंद करून केवळ ‘शिवशाही’ गाड्या सुरू करण्याचा निर्णय राज्य परिवहन महामंडळाच्या पुणे आणि नाशिक या दोन्ही विभागांनी घेतला आहे. ‘शिवनेरी’ने नियमीत प्रवास करणारा एक वर्ग असून, या प्रवाशांकडून मात्र एसटीच्या या निर्णयाबाबत नाराजी व्यक्त करण्यात येत आहे.

कमी दरात वातानुकूलित प्रवास
एसटीच्या शिवनेरी गाड्यांना सर्वच मार्गावर चांगला प्रतिसाद मिळतो आहे. या सेवेच्या तिकिटांचा दर अधिक असला, तरी याच गाडीने नियमीत प्रवास करणार्‍या प्रवाशांची संख्याही मोठी आहे. अलीकडेच एसटीच्या ताफ्यामध्ये शिवशाही गाड्यांचा समावेश करण्यात आला आहे. या गाड्याही वातानुकूलित असून, विविध सुविधांनी सज्ज आहेत. या गाड्यांचा तिकीट दर शिवनेरीपेक्षा कमी आहे. त्यामुळे कमी दरामध्ये प्रवाशांना वातानुकूलित प्रवास करण्याचा आनंद देण्यासाठी शिवनेरीची सेवा बंद केली असल्याचे एसटीकडून सांगण्यात येत आहे.

दररोज 12 गाड्या
पुण्याहून नाशिकसाठी चार शिवनेरी आणि आठ हिरकणी गाड्या सोडण्यात येत होत्या. नाशिक विभागातूनही पुण्यासाठी चार शिवनेरी आणि आठ हिरकणी गाड्या सोडण्यात येत होत्या. या सर्व गाड्या इतर विभागात वळविण्यात आल्या असून, पुणे- नाशिक मार्गावर आता केवळ शिवशाही प्रकारातील गाड्या सोडण्यात येणार आहेत. पुणे आणि नाशिक विभागातून प्रत्येकी दररोज 12 शिवशाही गाड्या सोडण्यात येत आहेत. कमी तिकीट दरामध्ये वातानुकूलित सेवा मिळत असली, तरी शिवनेरी गाडीने प्रवास करणार्‍यांची संख्याही मोठी होती. अधिक पैसे देऊन या गाडीने प्रवास करणारा ठरावीक वर्ग आहे. त्याची या गाडीला पसंती आहे. ती बंद केल्याने या प्रवासी वर्गातून नाराजीचा सूर निघत आहे.

हिरकणीच्या प्रवाशांना भुर्दंड
शिवनेरी गाड्यांचे मोठ्या दराचे तिकीट काढून प्रवास करणार्‍यांबरोबर हिरकणीसारख्या साध्या गाडीतून कमी दरात प्रवास करणार्‍या प्रवाशांचाही एक वर्ग आहे. पुणे-नाशिक मार्गावर शिवनेरीसह हिरकणी गाड्याही बंद करून केवळ शिवशाही गाड्या सुरू करण्यात आल्याने हिरकणीच्या प्रवाशांना नाहक भुर्दंड सोसावा लागणार आहे. हिरकणीपेक्षा शिवशाही गाड्यांचा तिकीट दर दहा टक्क्यांनी अधिक आहे. हिरकणीच्या प्रवाशांना आता पुणे-नाशिक प्रवासासाठी दहा टक्के जादा रक्कम मोजावी लागणार आहे.

कमी पैशात चांगली सुविधा
शिवनेरी गाडीसाठी सर्वाधिक भाडे आहे. हिरकणी ही निमआराम गाडी असल्याने या गाडीला तुलनेने कमी तिकीट आहे. मात्र, शिवशाही गाडी पूर्णपणे आरामगाडी आहे. त्यात वातानुकूलित यंत्रणा, मोबाईल चार्जिगची सुविधाही आहे. हिरकणीपेक्षा या गाडीला केवळ दहा टक्के जादा तिकीट आकारले जाते. कमी पैशात चांगली सेवा देण्याचा उद्देश आहे.
– श्रीनिवास जोशी
एसटी पुणे विभाग नियंत्रक