आता व्हॉट्सअ‍ॅपवर चुकून पाठवलेला मेसेज डिलिट करता येईल
नवी दिल्ली : कधीकधी व्हॉटसअ‍ॅपवरून चुकून भलत्याच व्यक्तीला मेसेज पाठवला जातो. ती व्यक्ती तिर्‍हाईत असेल तर चुकीच्या मेसेजमुळे वाईट अनुभव येण्याची शक्यता असते. त्यामुळे अशी चूक घडल्यानंतर हा मेसेज त्या व्यक्तीपर्यंत पोहोचण्यापूर्वीच डिलिट किंवा अनसेंड करता येणार आहे. आगामी काही दिवसांत व्हॉटसअ‍ॅपवर एक नवीन फीचर उपलब्ध होणार असून डिलीट फॉर एवरीवन असे या फीचरचे नाव असेल.
पाच मिनिटांत करा अनसेंड
जर अनावधानाने एखाद्या ग्रुपमध्ये किंवा व्यक्तीला मेसेज गेले तर पाच मिनिटांच्या आत युजरला या फीचरमुळे ते मेसेज अनसेंड करता येतील. फक्त टेक्स्ट मेसेजच नाही तर फोटो, डॉक्युमेंट, व्हिडिओ, जीआयएफ देखील अनसेंड करता येणार आहे. पण समोरच्या व्यक्तीने तुमचा मेसेज लगेच वाचला तर मात्र तुमच्याकडे काहीच पर्याय नसेल. या फीचरची यशस्वी चाचणी झाली असून लवकरच युजरला या फीचरचा लाभ घेता येणार आहे.
120 कोटी युजर्स
डिलीट फॉर एव्हरीवन फीचरचे काम व्हॉट्सअ‍ॅप करत आहे. यामुळे पाठवण्यात आलेले मेसेज रिकॉल केले जात आहेत. कोणताही गाजावाजा न करता हे फीचर सुरु करण्यात येणार असून लवकरच युजर्सना ही सुविधा उपलब्ध होणार आहे. जगभरात सध्याच्या घडीला व्हॉट्सअ‍ॅप वापरणार्‍यांची संख्या ही 120 कोटींच्या घरात आहे. 2009 साली सुरु करण्यात आलेल्या व्हॉट्सअ‍ॅप या कंपनीला 2014 साली फेसबुकने तब्बल 19 अब्ज डॉलर्स मोजून विकत घेतले होते.