आता ९ सप्टेंबरला मुस्लिम आरक्षणासाठी मोर्चा

पुणे-मुस्लिम समाजाच्या आरक्षणासाठी ९ सप्टेंबरला पुण्यातील गोळीबार मैदान ते विभागीय कार्यालयावर मोर्चा काढला जाणार आहे. मुस्लिम समाजाला दिलेले ५ टक्के आरक्षण कायम राहावे आणि त्याची त्वरित अंमलबजावणी करण्यात यावी. तसेच मुस्लिम समाजाला अॅट्रॉसिटी कायद्याचे सरंक्षण द्यावे. यांसह अनेक मागण्यांसाठी हा मोर्चा असणार आहे.

पुण्यात मुस्लिम मूक महामोर्चा समनव्य समितीच्यावतीने पत्रकार परिषद आयोजित केली होती. यावेळी नगरसेवक गफूर पठाण, अंजुम इनामदार, राहुल डंबाळे आणि अल्ताफ शेख आदी उपस्थित होते.

निवडणुकीच्या काळात राजकीय नेत्यांना मुस्लिम समाज आठवतो आणि निवडणुका झाल्यावर या समाजाला वाऱ्यावर सोडले जाते. त्यामुळे मुस्लिम समाजातील तरुण-तरुणींना अन्यायाला सामोरे जावे लागत आहे. यावर कोणताही नेता बोलण्यास तयार नाही. या सर्व परिस्थितीला लोकप्रतिनिधी जबाबदार असून त्यांनी योग्य धोरण तयार करावे, असे आवाहन यावेळी करण्यात आले.