आता 8.30 तासात रेल्वेने मुंबई-गोवा होणार शक्य
मुंबई: भारतीय रेल्वेला अधिक गतिशील बनवण्याच्या रेल्वे खात्याच्या प्रयत्नाचा एक भाग म्हणून सुपरफास्ट तेजस एक्स्प्रेस लवकरच रुळांवर अवतरणार आहे. ही हायटेक ट्रेन मुंबईत दाखलही झाली आहे. या ट्रेनला सोमवारी, 22 मे रोजी मुंबई सीएसटी येथून हिरवा कंदील दाखवला जाणार आहे. त्यानंतर या सुपरफास्ट रेल्वेचा मुंबई ते करमाळी स्टेशन असा प्रवास सुरु होणार आहे.
स्वतः रेल्वेमंत्री सुरेश प्रभू हे या महत्वाकांक्षी प्रकल्पातील रेल्वेला हिरवा झेंडा दाखवणार आहेत. तत्पूर्वी काल दिल्लीच्या सफदरजंग स्टेशनवर या ट्रेनची पाहणी करण्यात आली. या सुपरफास्ट रेल्वेचे रॅक कपूरथलाच्या रेल्वे कारखान्यात बनवण्यात आले आहे. तेजस ट्रेनच्या डब्ब्याचे डिझाईन सुरेश प्रभूंना यांना आवडले. ते म्हणाले की, तेजस एक्स्प्रेस सर्वात आधी मुंबई आणि गोव्यात धावेल. त्यानंतर मुंबई-अहमदाबाद, आनंद विहार-लखनऊ आणि दिल्ली-चंदीगडमध्ये चालवण्यात येईल.
200 किमी प्रतितास वेगाने धावणारी तेजस ही देशातील पहिली ट्रेन असेल. तेजस एक्स्प्रेसचा प्रत्येक डब्बा बनवण्यासाठी रेल्वेला 3 कोटी 25 लाख रुपये खर्च करावे लागले आहेत. याचे दरवाजे स्वयंचलित असतील. शिवाय यात सीसीटीव्ही कॅमेरा, कॉल बेल, एलईडी टीव्ही, यूएसबी चार्जिंग इत्यादी सुविधाही असतील. ही ट्रेन आठवड्याच्या पाच दिवस धावणार आहे. या ट्रेनला एकूण 7 थांबे आहेत. तेजस एक्स्प्रेस अवघ्या 8.30 तासात गोव्यातील करमाळी स्टेशनवर पोहोचेल. तर पावळ्यात कोकणातील परिस्थिती पाहता ट्रेनला करमाळीला पोहोचण्यासाठी 10.30 तास लागतील. तेजस ट्रेनमध्ये विमानाप्रमाणे सोईसुविधा पुरवण्यात आलेल्या असून अत्याधुनिक रेल्वे प्रवासाचे स्वप्न तेजसच्या माध्यमातून पूर्ण होत आहे. संपूर्ण ट्रेनवर खास प्रकारचे पॅटर्न छापण्यात आला आहे. तेजस ट्रेनचे भाडं शताब्दी ट्रेनच्या तुलनेत जास्त असेल.
असे असेल ‘तेजस’चे वेळापत्रक
पावसाळ्यातील वेळापत्रक
सोमवार, बुधवार, शनिवार
सीएसटी – पहाटे 5.00 वाजता – करमाळी – दुपारी 3.40 वाजता
परतीचा प्रवास
मंगळवार, गुरुवार, रविवार
करमाळी – दुपारी 2.30 वाजता – सीएसटी – रात्री 11 वाजता
पावसाळा व्यतिरीक्त वेळापत्रक
बुधवार, गुरुवार, शुक्रवार, शनिवार, रविवार
सीएसटी – पहाटे 5 वाजता – करमाळी – दुपारी 1.30 वाजता
परतीचा प्रवास
करमाळी – दुपारी 2.30 वाजता – सीएसटी – रात्री 11 वाजता
तेजसचे थांबे
सीएसटी, दादर, ठाणे, पनवेल, रत्नागिरी, कुडाळ, करमाळी