आत्महत्त्येस प्रवृत्त केल्याप्रकरणी संशयिताची न्यायालयीन कोठडीत रवागनी

जळगाव । महिलेसोबत संबंध असल्याचा आरोप करुन चारित्र्यावर संशय घेऊन दोघांनी हिरा शिवा कॉलनीतील तरुणाला बेदम मारहाण केली. बदनामीच्या भितीने त्या तरुणाने 23 फेब्रुवारी रोजी सायंकाळी घरात गळफास घेऊन आत्महत्या केली. या प्रकरणी दाखल गुन्ह्यावरून तालुका पोलिसांनी एका संशयिताला 26 फेब्रुवारी रोजी अटक केली होती. त्याच्या पोलिस कोठडीची मुदत गुरूवारी संपली. त्याला प्रथमवर्ग न्यायदंडाधिकारी एम. एम. चौधरी यांच्या न्यायालयात हजर केले असता त्यांनी न्यायालयीन कोठडी सुनावली.

26 फेब्रुवारीला केली होती अटक
हिराशिवा कॉलनीत केदार सुभाष पाटील (वय 26) याचे परिसरात राहणार्‍या एका महिलेशी संबंध होते. तो त्या महिलेला दुचाकीने दुकानात सोडत असे, असा आरोप करीत परिसरातच राहणार्‍या गजानन सुदाम निकम (वय 28, रा. हिराशिवा कॉलनी), गौरव सोनवणे या दोघांनी केदारला 22 फेब्रुवारी रोजी रात्री 9 वाजेच्या सुमारास निमखेडी रस्त्यावरील कृषी तंत्र विद्यालयासमोर नेऊन अंधारात बेदम मारहाण केली. तसेच मारहाण करीत असल्याचे रेकॉर्डिंग मोबाइलमध्ये केले. या प्रकारामुळे घाबरलेल्या केदारने 23 फेब्रुवारी रोजी साडीने गळफास घेऊन आत्महत्या केली. या प्रकरणी गजनान निकम आणि गौरव सोनवणे यांच्या विरोधात आत्महत्येस प्रवृत्त केल्याचा गुन्हा दाखल करण्यात आला. त्या पैकी गजानन याला पोलिसांनी 26 फेब्रुवारी रोजी अटक केली. त्याच्या पोलिस कोठडीची मुदत गुरूवारी संपली. त्याला न्यायाधीश चौधरी यांच्या न्यायालया हजर केले असता त्यांनी न्यायालयीन कोठडी सुनावली. सरकारतर्फे अ‍ॅड. निखिल कुलकर्णी यांनी कामकाज पाहिले. या प्रकरणातील दुसरा संशयित गौरव सोनवणे हा अजून फरार आहे.

चोरट्याला 4 पर्यंत पोलिस कोठडी
जळगाव- देवेंद्रनगरातील साईदास मोरसिंग राठोड यांच्या कार चोरी प्रकरणी पोलिसांनी तिसर्‍या संशयीताला 24 फेब्रुवारी रोजी बुलडाणा जिल्ह्यातून अटक केली. त्याच्या पोलिस कोठडीची मुदत बुधवारी संपली. त्त्याला रामानंदनगर पोलिसांनी दुसर्‍या गुन्ह्यात ताब्यात घेतले. त्याला गुरूवारी न्या.कुलकर्णी यांच्या न्यायालयात हजर केले असता त्यांनी 4 मार्चपर्यंत कोठडी सुनावली. प्रभात चौकातील प्रियदर्शनी अपार्टमेंट मधील प्रशांत रमेश बोंडे यांची कार 19 जुलै 2016 रोजी चोरीला गेली होती. या प्रकरणी रामानंदनगर पोलिसांनी हर्षद भगवान गंगतीरे या गुरूवारी ताब्यात घेतले. त्याला न्यायाधीश कुलकर्णी यांच्या न्यायालयात हजर केले असता त्यांनी 4 मार्च पर्यंत पोलिस कोठडी सुनावली आहे.