आदित्य ठाकरेंच्या समोरच अभाविप, युवसेनेच्या कार्यकर्त्यांमध्ये हाणामारी

ठाणे: मुंबई विद्यापीठाच्या कल्याण उपकेंद्राच्या उद्घाटन कार्यक्रमात आज गुरुवारी अखिल भारतीय विद्यार्थी परिषद आणि युवासेनेच्या कार्यकर्त्यांमध्ये तुफान राडा झाला. या कार्यक्रमाला युवासेनेचे प्रमुख आदित्य ठाकरे यांना बोलावण्यात आल्यामुळे अभविपच्या कार्यकर्त्यांनी आक्षेप घेतला. पर्यवसन तुफान हाणामारीत झाले. या कार्यक्रमाला राजकीय स्वरुप देऊ नये, अशी मागणी अभाविपने केली होती. आदित्य ठाकरे यांच्याकडे कोणतेही संवैधानिक पद नसताना त्यांना या कार्यक्रमाला का बोलावण्यात आले, असा सवाल यावेळी अभाविपच्या कार्यकर्त्यांनी उपस्थित केला. आदित्य ठाकरे कार्यक्रमस्थळी उपस्थित असतानाच हा सगळा प्रकार घडला. त्यामुळे गोंधळाचे वातावरण निर्माण झाले होते. अखेर पोलिसांनी ‘अभाविप’च्या कार्यकर्त्यांना बाहेर काढले.

या कार्यक्रमाला सांस्कृतिक मंत्री विनोद तावडे यांच्यासह भाजपचे काही नेते उपस्थित राहणार होते. मात्र, ऐनवेळी या नेत्यांना कार्यक्रमाला येणे टाळले. त्यामुळे शिवसेना-भाजपमध्ये अजूनही सर्व आलबेल नसल्याची शंका काहींनी बोलून दाखविली.