आदित्य ठाकरे घेणार मुख्यमंत्री पदाची शपथ

मुंबई: राज्यात मुख्यमंत्री पदाचा तिढा सुटला नसून, सेना, भाजप आपल्या मागण्यावर ठाम आहे. राज्याच्या विधानसभा समाप्त होण्याला अवघे तीन दिवस शिल्लक आहे. राज्यात सत्तास्थापन झाली नाही तर, राष्ट्रपती राजवट लागण्याची शक्यता वर्तवली जात आहे. अशातच आदित्य ठाकरे यांच्या जवळच्या सहकाऱ्याने आदित्य ठाकरे हे मुंबईतील शिवाजी पार्क मैदानावर मुख्यमंत्रिपदाची शपथ घेणार असल्याची माहिती दिली आहे.

युवासेना सदस्य राहुल कनाल यांनी यासंदर्भात एक ट्विट केलं आहे. या ट्विटमध्ये त्यांनी शिवसेना प्रमुख बाळासाहेब ठाकरे यांच्यासह आदित्य ठाकरे यांचा फोटो शेअर केला आहे. काही दिवसात शिवतीर्थावर हा आवाज घुमेल… मी हिंदुहृदयसम्राट बाळासाहेब ठाकरेंचा नातू आदित्य उद्धव ठाकरे ईश्वराची शपथ घेतो की… असा संदेशही त्यांनी यामध्ये लिहिला आहे.

शिवसेनेच्या अनेक कार्यकर्त्यांनी आदित्य ठाकरे हेच मुख्यमंत्री होतील, असं म्हटलं होतं. तसंच शिवसेना पक्षप्रमुख उद्धव ठाकरे यांच्या मातोश्री या निवासस्थानाबाहेर एक बॅनर लावण्यात आलं आहे. माझा आमदार, माझा मुख्यमंत्री असं लिहित त्यावर युवासेना प्रमुख आमदार आदित्य ठाकरे यांचा फोटोही लावण्यात आला होता. शिवसेनेचे नगरसेवक हाजी हलीम खान यांनी हे बॅनर्स लावले होते. आदित्य ठाकरे यांच्या फोटोसह ‘माझा आमदार, माझा मुख्यमंत्री’ आणि साहेब आपण करून दाखवलं असाही संदेश त्यावर लिहिण्यात आला होता. त्यामुळे शिवसेनेची मुख्यमंत्रिपदाची मागणी अद्यापही कायम असून शिवसेनेच्या कार्यकर्त्यांकडून आदित्य ठाकरे यांचंच नाव पुढे होताना दिसत आहे. राज्यात सध्या सत्तास्थापनेचा तिढा सुटताना दिसत नाहीये.