आदिनाथ कोठारे फेक फेसबुक अकाउंटः पोलिसांकडे तक्रार

मुंबई :ज्या कलाकारांचे् जास्त फॅन पॅज तेवढीच त्याची प्रसिद्धी जास्त असा सर्वसाधारण समज ही आहे. आज सोशल मीडियावर लोकप्रिय कलाकाराच्या नावानं अनेक फॅन पेज व त्यांच्या नावानं फेक अकाउंट आहेत. या फॅन पॅजवरून किंवा अकाउंटवरून त्यांचे अनेक फोटो शेअर केले जातात. मात्र अभिनेता आदिनाथ कोठारेला मात्र या फेक अकाउंटमुळं मनस्ताप सहन करावा लागला आहे. एका व्यक्तिनं आदिनाथचं फेक फेसबुक अकाउंट तयार करून त्याचा खोटा इमेल आयडी निर्माण केला आहे.

आदिनाथनं या विरोधात सायबर सेलकडं तक्रार केली असून सायबर सेल पोलिस या प्रकरणाचा तपास करत आहेत. कांदिवली पूर्व येथील समता नगर पोलिसांनी फसवणूक, बदनामी आणि खोटी ओळख दाखवून संगणकाच्या माध्यमातून फसवणुकी अंतर्गत गुन्हा नोंदवला आहे. आदिनाथचा याच विषयांवर आधारित ‘टेक केअर गुड नाईट’ सिनेमा लवकरच प्रदर्शित होतं आहे.

आदिनाथच्या नावानं एका व्यक्तिनं एक बोगस फेसबुक अकाउंटचा तयार केलं आहे. या फेसबुक अकाउंटवरून त्यांच्या मित्र आणि नातेवाईकांशी संपर्क निर्माण करून त्यांना फसविण्याचा प्रयत्न केला गेला. या फेसबुक अकाउंटवरून कुटुंबाचे काही फोटोही शेअर करण्यात आले आहेत.