‘आप’चा जाहीरनामा: स्वच्छता कर्मचाऱ्याचा मृत्यू झाल्यास एक कोटींची मदत देणार !
नवी दिल्ली: दिल्ली विधानसभेसाठी ८ फेब्रुवारीला मतदान होत आहे. ११ फेब्रुवारीला निकाल जाहीर होईल. भाजप आणि सत्ताधारी आम आदमी पक्षाने ही निवडणूक अतिशय प्रतिष्ठेची केली आहे. दिल्लीतील सत्ता कायम ठेवण्यासाठी आम आदमी पक्ष गेल्या पाच वर्षात केलेल्या कामावर मत मागत आहे तर भाजपकडून शाइन बागसह इतर मुद्द्यांवर केजरीवाल यांना लक्ष केले जात आहे. दरम्यान दिल्ली विधानसभेसाठी आम आदमी पक्षाने आज आपला जाहीरनामा प्रसिद्ध केला. स्वच्छता कर्मचाऱ्याचे कामावर असताना मृत्यू झाल्यास त्यांच्या कुटुंबियांना एक कोटींची मदत देण्यात येईल असे आश्वासन मुख्यमंत्री अरविंद केजरीवाल यांनी दिले आहे. पक्ष कार्यालयात मुख्यमंत्री अरविंद केजरीवाल यांच्या उपस्थितीत जाहीरनामा प्रसिद्ध झाला. यावेळी मंत्री मनीष सिसोदिया यांच्यासह नेते उपस्थित होते.
भाजपने आपल्या जाहीरनाम्यात महाविद्यालयीन गरीब विद्यार्थिनींना स्कूटर देण्याचे आश्वासन दिले आहे तर कॉंग्रेसने बेरोजगार तरुणांना साडेसात हजार रुपये बेरोजगार भत्ता देण्याचे आश्वासन दिले आहे.
भारतीय जनता पक्षाने दिल्लीचा मुख्यमंत्री पदाचा उमेदवार जाहीर करावा, त्याच्याशी दिल्लीच्या विषयावर चर्चा करण्याचे आव्हान देखील अरविंद केजरीवाल यांनी दिले आहे.