आपच्या आमदार अलका लांबा कॉंग्रेसच्या वाटेवर; सोनिया गांधींची घेतली भेट !

नवी दिल्ली: दिल्लीतील चांदणी चौक मतदारसंघातील आम आदमी पार्टीच्या आमदार अलका लांबा या काँग्रेसमध्ये प्रवेश करण्याची शक्यता आहे. आज मंगळवारी त्यांनी काँग्रेस अध्यक्षा सोनिया गांधी यांची भेट घेतली. या भेटीनंतर त्यांच्या काँग्रेस प्रवेशाच्या चर्चांना वेग आला आहे. अनेक महिन्यांपासून त्या पक्षावर आणि पक्षप्रमुख अरविंद केजरीवाल यांच्यावर नाराज आहेत.

पुढच्या वर्षी २०२० मध्ये दिल्लीत विधानसभा निवडणुका पार पडणार आहेत. ऑगस्टमध्ये अलका लांबा यांनी आपण पक्षाच्या प्राथमिक सदस्यत्वाचा राजीनामा देणार असल्याचे घोषित केले होते. तसेच आगामी निवडणूक ही अपक्ष म्हणून लढवणार असल्याचे म्हटले होते. यावर पक्षानेही त्यांचा राजीनामा स्विकारण्यास तयार असल्याचे म्हटले होते. मात्र, त्यांनी अद्याप राजीनामा दिलेला नाही. नाराज असल्याने लांबा यांनी लोकसभा निवडणुकीत प्रचार करण्यासही नकार दिला होता. एप्रिल महिन्यांत अलका लांबा आणि आपचे प्रवक्ते सौरभ भारद्वाज यांच्यासोबत ट्विटरवरुन खडागंजी झाली होती. यावेळी भारद्वाज यांनी लांबा यांना टोमणे मारत पक्षाचा राजीनामा देण्यास सांगितले होते.