आमदार बच्चू कडूंनी आयुक्तांवर उगारला हात

नाशिक : नाशिकचे महापालिका आयुक्त अभिषेक कृष्णा यांच्या अंगावर धावून जाऊन त्यांना शिवीगाळ करत हात उगारल्याप्रकरणी आमदार बच्चू कडू यांना अटक करून नंतर जामीनावर त्यांची मुक्तता करण्यात आली आहे. कडू यांच्याविरूध्द सरकारी कामात अडथळा आणल्याप्रकरणी सरकारवाडा पोलीसांत गुन्हा दाखल झाला आहे. नाशिक महानगरपालिकेकडून अपंगांचा तीन टक्के राखीव निधी आजवर खर्च केला जात नाही तसेच 1995 चा अपंग पुनर्वसन कायदा महानगरपालिकेने अंमलात आणला नसल्याचा आरोप करत प्रहार संघटनेच्या नेतृत्वाखाली सोमवारी महापालिकेच्या मुख्यालयासमोर दुपारी 12 वाजेपासून धरणे आंदोलन करण्यात आले होते. यात महापालिका आयुक्त कृष्णा यांना निवेदन देतेवेळी आमदार कडू हे त्यांच्या अंगावर धावून गेल्याने वाद चिघळला होता. कडूंनी आयुक्तांना शिवीगाळ करत हात उगारल्यामुळे तणावाचे वातावरण निर्माण झाले. यावेळी पोलीस कर्मचार्‍यांनी आयुक्त अभिषेक कृष्णा यांना संरक्षण देत बाहेर घेऊन गेल्याने पुढील अनर्थ टळला. दरम्यान, त्यांच्या प्रहार संघटनेतर्फे सायंकाळपर्यंत आंदोलन सुरूच होते.

काय आहे प्रकरण ?
नाशिक महापालिकेने 1995चा अपंग पुनर्वसन कायदा अद्याप अंमलात आणला नाही. तसेच अपंगांचा राखीव तीन टक्के निधी आजपर्यंत खर्च केला जात नसल्यामुळे नाशिक महापालिकेसमोर सोमवारी दुपारपासून ‘प्रहार’ या संघटनेतर्फे धरणे आंदोलन सुरू आहे. काही काळ निषेधाच्या घोषणा दिल्यानंतर या आंदोलनाचे नेतृत्त्व करणारे आमदार बच्चू कडू यांनी शिष्टमंडळासमवेत महापालिका आयुक्त अभिषेक कृष्ण यांची भेट घेतली. यावेळी त्यांची आयुक्तांसोबत शाब्दीक चकमक झाली. यानंतर आमदार कडू यांचा संयम सुटल्याने त्यांनी थेट कृष्ण यांच्यावर हात उगारला. शिष्टमंडळाच्या कार्यकर्त्यांनी कडू यांना रोखले अन्यथा अनर्थ झाला असता. नाशिकच्या मनपा आयुक्तांवर हात उगारल्याप्रकरणी सरकारी कामात अडथळा आणण्याचा गुन्हा त्यांच्याविरोधात दाखल करण्यात आला आहे.