आयओएचे आजीवन अध्यक्षपद कलमाडींनी नाकारले

पुणे : माजी खासदार सुरेश कलमाडींनी इंडियन ऑलिम्पिक असोसिएशनचे आजीवन अध्यक्षपद नाकारले आहे. त्यांची आयओएच्या मानद आजीवन अध्यक्षपदी नियुक्ती करण्यात आली होती. आज आयओएला पत्र लिहून आपण हे पद स्वीकारु शकत नसल्याचे स्पष्ट केले आहे. राष्ट्रकूल घोटाळ्याप्रकरणी तुरुंगाची हवा खावी लागलेले आयओएचे माजी अध्यक्ष सुरेश कलमाडी, यांची आयओएच्या मानद आजीव अध्यक्षपदी नियुक्ती करण्यात आली होती. चेन्नईत झालेल्या आयओएच्या वार्षिक सभेत एकमताने हा निर्णय घेण्यात आला.

भ्रष्टाचाराचे आरोप असलेल्या व्यक्तींची आयओएमध्ये एखाद्या मानाच्या पदावर निवड केली जाते, याविषयी क्रीडाक्षेत्रात आश्चर्य व्यक्त केले जात होते. आयओएच्या कारभारावरही त्यामुळं प्रश्नचिन्ह उभे राहिले होते. मात्र कलमाडींनी आयओएला पत्र लिहून दिलेल्या बहुमानासाठी आभारही मानले आहेत. काल कलमाडींची नियुक्ती झाल्यानंतर केंद्रीय क्रीडामंत्री विजय गोयल यांनी कलमाडींच्या नियुक्तीची लगेचच दखल घेत या प्रकरणी अहवाल मागितला होता, तसेच कारवाईचेही संकेतही दिले होते.