आयशरच्या धडकेत दुचाकीस्वार ठार

एक गंभीर; सावळदा फाट्यावरील घटना
शहादा-  तालुक्यातील सावळदा फाटयाजवळ भरधाव वेगात येणार्‍या आयशरने दुचाकीला जबर धडक दिल्याने दोघ भावांपैकी एकाच्या डोक्याला जबर मार लागल्याने त्याचा उपचारा दरम्यान मृत्यू झाला तर दुसर्‍यास खाजगी रुग्णालयात उपचारासाठी दाखल करण्यात आले आहे. भानुदास भबुता पाटील (54), असे मृताचे नाव आहे. ही घटना ही दुपारी अकरा वाजेचा सुमारास घडली आहे.

बामखेडा कडे जात असताना धडक
शहादा तालुक्यातील बामखेडा येथील भानुदास भबुता पाटील ( वय 54, हल्ली मुक्काम मलोणे) व शरद बभुता पाटील (वय 52) हे दोघे सकाळी 11 वाजेच्या सुमारास मलोणी येथुन बामखेडा गावाकडे निघाले ते डिस्कव्हर मोटरसायकल (39 एल 2226) ने जात होते. शरद पाटील हे दुचाकी चालवत होते तर भानुदास पाटील हे मागे बसले होते. दोंडाईचा रस्त्यावरून अनरद बारीकडे जात असतांना दोंडाईचा कडून शहाद्याकडे येणार्‍या एका आयशर ट्रक क्र.(एमएच 15 बी 6741) या वाहनाने मोटारसायकलला सावळदा फाट्याचा अलीकडे कृष्णा पाइप फॅक्टरी समोर जोरदार धडक दिली. मोटारसायकल वरील दोघे पडल्याने भानुदास पाटील यांच्या डोक्याला मागील बाजुस् व हाताला जबर मार लागला तर शरद पाटील यांच्या कपाळावर मार लागला. त्यांना रूग्णालयात दाखल केल्यानंतर उपचारादरम्यान भानूदास पाटील यांचा मृत्यू झाला.

दरम्यान, भानुदास पाटील यांचे लोणखेडा येथे भोजनालय आहे. एक मुलगा व एक मुलगी आहे. पैकी मुलांचे दोन दिवसापुर्वीच विवाह संबंध जुडले आहेत. तर मुलीचा विवाह निश्‍चित करण्या साठी दोघे भाऊ शहादा तालुक्यातील पुसनद येथे निघाले होते. दोघांचे लग्न निश्‍चित झाल्यानंतर एप्रिल महिन्यात होणार्‍या गुजर समाज मंचचा सामूहिक विवाह सोहळ्यात हा विवाह निश्‍चित करणार होते. विवाहपुर्वीच वडिलांचा मृत्यू झाल्याने बामखेडात व मलोणी येथे शोकाकूल वातावरण पसरले आहे. या अपघाता संदर्भात शहादा पोलिसांत आयशर चालकाविरूद्घ गुन्हा दाखल करण्यात आला आहे.