आयुक्तांनी घेतला अमृत योजना व इतर सुविधा कामांचा प्रत्यक्ष आढावा

नवी मुंबई । नागरिकांसाठी पुरवण्यात येणार्‍या नागरी सुविधा कामांमधील गुणवत्ता चांगली असावी तसेच कामांमध्ये गतिमानता यावी याकडे महापालिका आयुक्त डॉ. रामास्वामी एन. यांचे कटाक्षाने लक्ष असून, त्यांनी अतिरिक्त आयुक्त रमेश चव्हाण, शहर अभियंता मोहन डगांवकर आणि संबंधित अधिकारी यांच्यासह केंद्र सरकारच्या अमृत योजनेअंतर्गत करण्यात येत असलेल्या तसेच इतर सुविधा कामांची पाहणी केली.या आढावा दौ-यात आयुक्तांनी ज्वेल ऑफ नवी मुंबई, नेरूळ तसेच घणसोली सेक्टर 20 येथील नाल्याशेजारी त्याचप्रमाणे सेक्टर 10 वाशी येथईल मिनी सी शोअर व सेक्टर 30 सानपाडा येथे केंद्र सरकारच्या अमृत योजनेअंतर्गत सुरू असलेल्या हरित पट्टा विकास कामांची पाहणी केली.

शहरामंध्ये मोठमोठ्या इमारती तसेच प्रशस्त रस्ते, पदपथ अशा पायाभूत सुविधा विकसित होत असताना पर्यावरणशीलता जपणे अत्यंत गरजेचे आहे. त्यामुळे उद्याने, हरितपट्टे हे शहरांना प्राणवायू पुरवणारी फुप्फुसे आहेत हे लक्षात घेऊन अमृत योजनेअंतर्गत ही हरितपट्टा विकासाची कामे सुरू आहेत. या कामांची प्रत्यक्ष पाहणी करून आयुक्तांनी याठिकाणी काँक्रिटीकरणाचे प्रमाण अत्यल्प ठेवून हरितकरणाचे प्रमाण जास्तीत जास्त ठेवावे असे सूचित करत येथे नैसर्गिकता जपावी असे निर्देश दिले. याठिकाणी लावण्यात येणारी वृक्षरोपे मोठ्या आकाराची असावीत तसेच त्यांच्या पाण्याची व्यवस्था पुरेशी व कायमस्वरूपी असावी असे त्यांनी विशेषत्वाने सूचित केले. अशाचप्रकारे आयुक्तांनी आग्रोळी तलाव सुधारणा कामाठिकाणी भेट देऊन तेथील कामाची प्रत्यक्ष पाहणी केली. आग्रोळी तलावाच्या कठड्याच्या भिंती जुन्या व जीर्ण झाल्याने त्या काही ठिकाणी ढासळल्या होत्या तसेच त्या सभोवतालच्या पदपथांना तडे गेले होते, त्याचप्रमाणे तलाव सफाईची आवश्यकता होता. या सर्व बाबी लक्षात घेऊन आग्रोळी तलावाच्या सुधारणेचे काम हाती घेण्यात आले होते. या कामाची प्रत्यक्ष पाहणी करताना आयुक्त डॉ. रामास्वामी एन. यांनी पावसाळ्यापूर्वी हे काम पूर्ण करण्याच्या दृष्टीने कामाची गती वाढवण्याच्या सूचना केल्या. तलावातून निघणारी माती तेथून नजिकच्या महापालिका उद्यानांकरिता वापरावी अशी मौलिक सूचना आयुक्तांनी यावेळी केली.

त्याचप्रमाणे शहाबाज येथील ग्रामपंचायतकालीन जुन्या अंगणवाडी इमारतीच्या जागी बांधण्याचे नियोजन असलेल्या बहुउद्देशीय इमारतीच्या जागेस भेट देऊन आयुक्तांनी कामाच्या गरजेचा आढावा घेतला. आसपासच्या परिसरात समाजमंदिर अथवा तत्सम इमारत नसल्याने नागरिकांच्या विविध कार्यक्रम, उपक्रमांसाठी सुविधाजनक ठरेल अशी इमारत असावी यादृष्टीने त्याठिकाणी भरणा-या अंगणवाडीतील शिक्षकांशी संवाद साधून त्यांनी तेथील शैक्षणिक सद्यःस्थिती जाणून घेतली.