आरटीईअंतर्गत राखीव जागांसाठी 8 फेब्रुवारीपासून अर्जप्रक्रिया

पुणे । शिक्षण हक्क कायद्यानुसार (आरटीई) दिल्या जाणार्‍या 25 टक्के राखीव जागांच्या प्रवेश प्रक्रिया अखेर 8 जानेवारीपासून राज्यभरात सुरू होणार आहेत. यासाठी आता पालकांना उत्पन्नाचा दाखला काढावा लागणार असून, त्यांनी वेळेत हा दाखला काढला नाही तर, त्यांना प्रवेशासाठी मुकावे लागणार आहे, अशी माहितीही शिक्षण उपसंचालक कार्यालयातून देण्यात आली आहे. महाऑनलाईन या संकेतस्थळावरून ऑनलाईन नोंद करायची असून, त्यासाठी काही तांत्रिक अडचणी येत असल्याची माहितीही पालकांनी दिली आहे.

जागा अधिक व शाळा कमी!
राज्यभरात आरटीईची ऑनलाईन प्रवेशप्रक्रिया 24 जानेवारीपासून सुरू होणे अपेक्षित होते; मात्र शाळा नोंदणीच न झाल्याने हे वेळापत्रक पुढे ढकलण्यात आले होते. आरटीईच्या संकेतस्थळावर सध्या अपेक्षित शाळा संख्या कमी झाली आहे. मात्र, काही शाळांच्या शाखांचे विलिनीकरण करून माहिती भरल्याने जागा अधिक व शाळा कमी दिसत असल्याचे अधिकार्‍यांचे म्हणणे आहे. सध्या पुण्यात 929 शाळांमध्ये 16 हजार 354 जागा उपलब्ध असल्याचे दिसत आहे; तर एकूणच राज्यात 8 हजार 979 शाळांमध्ये 1 लाख 25 हजार 543 जागा उपलब्ध असल्याचे संकेतस्थळावरील आकडेवारीतून समोर आले आहे. युडीएडवरून शाळा शोधून काही शाळांना शिक्षण विभागाने नोंदणी करण्याच्या सूचना दिल्या आहेत.

हे करावे लागणार…
उत्पन्नाच्या दाखल्यावरील बारकोड टाकावा लागणार
विद्यार्थ्यांचा आधार क्रमांकही द्यावा लागणार मात्र अनिवार्यता नाही
विद्यार्थ्यांना दहा शाळांची निवड करता येणार व प्रवेशाची संधी एकदाच मिळणार
इयत्ता पहिलीसाठीचे किमान वय 5.8 वर्ष असावे

ग्रामीण भागात अडचणींचा डोंगर
यावर्षी प्रथमच उत्पन्न दाखला ऑनलाइन भरायचे असून तो ऑनलाइन लिंक केला जाऊन तपासला जाणार असल्याने, यात तांत्रिक अडचणी निर्माण होऊ शकतात. तसेच, शाळा व शिक्षण अधिकारी यांनी ग्रामीण भागात कुठेही माहिती फलक लावलेले नाहीत. या अडचणी दूर करत अर्जनोंदणी लवकर सुरू करावी, अशी मागणी आम आदमी पक्षाचे मुकुंद किर्दत यांनी शिक्षण विभागाकडे केली आहे. तर, लिंकमध्ये काही त्रुटी आढळल्या आहेत. या त्रुटी दूर करण्याचे काम सुरू आहे. 8 फेब्रुवारीपासून सर्वत्र प्रक्रिया सुरू केली जाईल, अशी माहिती शिक्षण उपसंचालक कार्यालयातून देण्यात आली आहे.