आरोग्याचे प्रश्‍न सोडविण्याबाबत बैठक
जळगाव । जिल्ह्यातील आरोग्य केंद्रांच्याबाबतीत समस्या वाढत असल्याचे लक्षात आल्यानंतर सहकार राज्यमंत्री ना. गुलाबराव पाटील यांनी नागरपूर अधिवेशना दरम्यान आरोग्य मंत्री डॉ. दीपक सावंत यांना याबाबत माहिती दिली. आरोग्यमंत्र्यांनी तात्काळ संबंधित विभागाची आढावा बैठक घेतली. या बैठकीत म्हसावद येथिल प्राथमिक आरोग्य केंद्रांचे श्रेणीवर्धन करुन ग्रामीण रुग्णालय करणे, अद्यावत रुग्णवाहिका, जिल्ह्यातील 9 प्राथमिक आरोग्य केंद्र व 111 उपकेंद्र स्थापना आराखडा मंजूरी बाबत तसेच रिक्तपदांसह विविध समस्यांवर उपाययोजना करण्यात आल्या आहेत.आरोग्य विषयक विविध प्रश्‍न मार्गी लावण्यासाठी सहकार राज्यमंत्री ना. गुलाबराव पाटील यांनी आरोग्यमंत्र्याकडे आग्रह धरला होता. 20 डिसेंबर रोजी नागपुर येथे आरोग्य मंत्री ना. डॉ. दीपक सांवत यांच्या अध्यक्षतेखाली व सहकार राज्यमंत्री ना. गुलाबराव पाटील, प्रधान सचिव डॉ. प्रदिप व्यास यांच्या प्रमुख उपस्थितीत जिल्ह्यातील ओराग्य विषयक समस्यांबाबत आढावा घेण्यात आला. यावेळी आरोग्य संचालक प्रदीप पवार, सह संचालक बी. डी. पवार, नाशिकच्या उपसंचालक ए. आर. घोडके, जळगाव जिल्हा शल्य चिकित्सक एन.एच.चव्हाण, जि.प.च्या जिल्हा आरोग्य अधिकारी बी.एस. कमलापुरकर उपस्थित होते.
माता व बालकांसाठी स्वतंत्र रुग्णालय
जिल्हा सामान्य रूग्णालयाच्या 6 एकरचा परिसरात अनधिकृत घरे होती. प्रशासनाने सदरची अतिक्रमणे काढून टाकली आहेत. या खुल्या जागेवर माता व बालकांसाठी स्वतंत्र सुपर स्पेशालिटी हॉस्पिटल (संदर्भ रूग्णालय) तसेच वर्ग 4 कर्मचार्‍यांसाठी निवासस्थाने बांधकामाचा प्रस्ताव शासनाकडे मंजुरीसाठी पाठविण्याचे आदेश दिले आहेत. लहान मुलांसाठी आयुसीयु बेडचाही प्रस्ताव सादर करण्याबाबत आदेश करण्यात आले.
9 प्राथमिक आरोग्य केंद्र व 111 उपकेंद्र
सन 2011 च्या लोकसंख्येवर आधारीत जिल्ह्यात 9 प्राथमिक आरोग्य केंद्र व 111 उपकेंद्र स्थापनेबाबतचा आराखड्यास मान्यता देण्याबाबत सविस्तर चर्चा करण्यात आली. सदर प्रस्ताव मंजुरीसाठी ना. गुलाबराव पाटील हे स्वतः पाठपुरावा करत होते. याबाबत लवकरच धोरणात्मक निर्णय घेण्यात येणार आहे. यात जळगांव ग्रामीण मतदार संघात 17 उपकेंद्र व 3 प्रा.आ.केंद्र नव्याने मंजुर करण्यात येणार आहेत. तसेच उपजिल्हा रूग्णालय जामनेर, ग्रामिण रूग्णालय पहुर, रावेर, पाचोरा, भडगांव व अमळनेर येथे 30 खाटांवरून 50 खाटांचे श्रेणीवर्धन करणे आणि प्रा.आ.केंद्र शिरसोदे, नेरी, फत्तेपुर व फैजपुर येथे देखील ग्रामीण रूग्णालय मंजुर करण्याबाबत आरोग्यमंत्र्यांनी आश्‍वासन दिले आहे. सदर आढावा बैठकीत आरोग्य विषयक अनेक प्रश्‍न मार्गी लागणार आहे.
म्हसावदला होणार ग्रामीण रुग्णालय!
सदर बैठकीत गेल्या अनेक महिन्यांपासून प्रलंबित असलेले जळगाव तालुक्यातील म्हसावद येथील प्राथमिक आरोग्य केंद्राचे श्रेणीवर्धन करून ग्रामिण रूग्णालय मंजुर करण्याबाबत निर्णय घेण्यात आला. याबाबतचा परिपूर्ण प्रस्ताव जिल्हा शल्य चिकित्सक व जिल्हा आरोग्य अधिकारी यांनी आरोग्य उपसंचालक नाशिक यांच्या मार्फत आरोग्य संचालक व प्रधान सचिवांकडे ना. गुलाबराव पाटील यांच्या सुचनेनुसार सादर केला होता. तसचे मुसळी फाट्यापासुन ते जळगांव राष्ट्रीय महामार्ग क्र. 6 वर वाढत्या अपघातामुळे अद्यावत रूग्णवाहिका (108) पाळधी येथे उपलब्ध करुन देण्यात येणार आहे.
धरणगावला मिळणार डॉक्टर !
धरणगांव ग्रामीण रूग्णालयात वैद्यकीय अधिकारी नसल्यामुळे रूग्णांची गैरसोय होत होती. ही बाब लक्षात घेवून आरोग्यमंत्र्यांनी धरणगांव ग्रामिण रूग्णालयात वर्ग -1 चे तीन वैद्यकीय अधिकारी देण्याचे निर्देश दिले आहेत. जिल्ह्यात वैद्यकीय अधिकारी वर्ग -1 चे मंजुर असलेल्या 37 पैकी 30 पदे रिक्त आहेत. वर्ग 2 ची 123 मंजुर पदांपैकी 30 पदे रिक्त तर 25 वैद्यकिय अधिकारी सतत गैरहजर असतात तर गट – क वर्गाचे 677 पदापैकी 139 तर गट ड वर्गाचे 380 पैकी 89 पदे रिक्त आहेत. जिल्ह्याच्या ग्रामिण व शहरी रूग्णांच्या संख्येत सतत वाढ होत असल्याने शासनाच्या योजनांचा व रूग्ण सेवेचा लाभ देण्यासाठी प्रशासकीय यंत्रणा अपूर्ण पडत आहे. या गंभीर विषयावर देखील सविस्तर चर्चा होवून लवकरच निर्णय घेवू,असे ठोस आश्‍वासन आरोग्यमंत्र्यांनी दिले आहे.