आरोग्य केंद्राची झाडाझडती

किन्हवली । ठाणे जिल्हा परिषदेचे मुख्य कार्यकारी अधिकारी विवेक भीमनवार यांनी शहापूर तालुक्यातील डोळखांब आरोग्य केंद्राला भेट देवून आरोग्य केंद्राची पाहणी केली. आरोग्य केंद्रात असणार्‍या रुग्णांची, गर्भवतींची विचारपूस करून आरोग्य केंद्राचा अहवाल तपासला. त्यानंतर उपलब्ध औषधांची पाहणी केली. यावेळी त्यांच्यासोबत जिल्हा आरोग्य अधिकारी डॉ. बी.एस.सोनावणे, सामान्य प्रशासन विभाग उप मुख्य कार्यकारी अधिकारी चंद्रकांत पवार आदी उपस्थित होते.

गाव-पाड्यांना दिल्या भेटी
या दौर्‍यात ठाणे जिल्हा परिषदेचे मुख्य कार्यकारी अधिकारी विवेक भीमनवार यांनी साकडबाव आरोग्य उपकेंद्राला भेट देऊन शहापूरच्या काही गाव-पाड्यांना भेटी दिल्या. गावातील आवश्यक सोयी-सुविधा, योजनांबाबत गावकर्‍यांशी संवाद साधला. गावकर्‍यांच्या समस्याही जाणून घेतल्या. प्रधानमंत्री आवास योजनेच्या अंतर्गत बांधण्यात येत असलेल्या घरकुलांची पाहणी करून जिल्हा परिषद शाळा, देवगाव आणि पारधवाडी येथेही भेटी देवून विद्यार्थ्यांशी संवाद साधला, अशी माहिती जिल्हा परिषदेचे जनसंपर्क अधिकारी पंकज चव्हाण यांनी दिली.