आरोग्य तपासणी खर्च आम्हाला द्या!

पुणे । नगरसेवकांनी लवकरात लवकर विविध तपासण्या करून घ्याव्यात आणि यासाठी पालिका प्रशासन आग्रही असतानाच काही नगरसेवक स्वत:च्या आरोग्य तपासणीवरही डोळा ठेवत असल्याची धक्कादायक बाब समोर आली आहे. महापालिकेने फक्त दोन रुग्णालयांची सक्ती करू नये, आम्ही आमच्या रुग्णालयात तपासणी करतो, त्याचा खर्च आम्हाला द्या, अशी मागणी नगरसेवकांकडून करण्यात येत आहे. त्यामुळे पालिका प्रशासनाची चांगलीच अडचण झाली असून नगरसेवकांना उत्तरे देताना प्रशासनाची तारांबळ उडाली आहे.

दैनंदिन कामाच्या धावपळीत नगरसेवकांना आरोग्याकडे लक्ष देण्यास वेळ मिळत नाही. त्यामुळे हे दुर्लक्ष जीवावर बेतण्याचीही शक्यता असते. त्यामुळे महापालिकेच्या सर्व विद्यमान नगरसेवकांनी तातडीने कॅन्सर तसेच हृदयाशी संबधित प्रतिबंधात्मक आरोग्य तपासण्या करून घेण्याचे पत्र पालिकेच्या आरोग्य विभागाने सर्व सदस्यांना दिले आहे. त्यासाठीची सुविधा कर्वे रस्त्यावरील सह्याद्री रूग्णालय तसेच रुबी हॉल क्लिनिकमध्ये करण्यात आली आहे. मात्र, नगरसेवकांना या दोन्ही रुग्णालयात तपासणी नको असल्याचे समोर आले आहे.

या वर्षभरात महापालिकेचे तत्कालीन उपमहापौर नवनाथ कांबळे आणि विद्यमान नगरसेविका तथा माजी महापौर चंचला कोद्रे यांचे हृदयविकाराने निधन झाले आहे. या दोन्ही सदस्यांना श्रध्दांजली वाहताना सर्वपक्षीय नगरसेवकांकडून आपल्या कामाचे स्वरूप तसेच धावपळीमुळे आरोग्याकडे लक्ष देता येत नाही. त्यामुळे आपणच आपली काळजी घ्यावी, असे आवाहन एकमेकांना करण्यात आले होते. तसेच कामाचा ताण न घेता दैनंदिन कामकाज सांभाळण्याच्या सूचनाही एकमेकांना करण्यात येत आहेत. मात्र, या दोन्ही सदस्यांच्या निधनाने सर्वपक्षीय सदस्यांमध्ये आरोग्याबाबत भीतीचे वातावरण असल्याचे चित्र आहे.

आरोग्याचा प्रश्‍न ऐरणीवर
प्रभागातील कामकाज तसेच नागरिकांच्या समस्या सोडण्यासाठी वर्षातील सर्व दिवस 24 तास नागरिकांसाठी उपलब्ध राहावे लागत असल्याने अनेकदा आहार तसेच व्यायामाकडे त्यांचे अक्षम्य दुर्लक्ष होते. परिणामी, नगरसेवकांना गंभीर आजारांचा सामना करावा लागत आहे. याशिवाय, कामाचा ताण तसेच तणावजन्य स्थितीमुळे त्यांच्या मानसिकतेवरही त्याचा परिणाम होतो. तसेच नगसेवकांमध्ये अनेकदा चिडचिड स्वभावाचे प्रमाणही वाढत असल्याचे दिसून येत आहे. त्यामुळे दैनंदिन जीवनशैलीमुळे नगरसेवकांच्या आरोग्याचा प्रश्‍न चांगलाच ऐरणीवर आला आहे. त्यामुळे खबरदारीचा उपाय म्हणून प्रशासनाने नगरसेवकांना हे तपासणीचे पत्र दिले आहे.

तणावाचा मुद्दा ऐरणीवर
माजी महापौर चंचला कोद्रे यांच्या निधनानंतर महापालिकेतील नगरसेवकांमध्ये तणावाचे वातावरण आहे. त्यामुळे अनेक नगरसेवकांनी आरोग्य तपासण्या करून घेण्यासाठी पुढाकार घेतलेला आहे. त्यात एका सत्ताधारी भाजपच्या एका ज्येष्ठ नगरसेवकाने तातडीने आपली आरोग्य तपासणी करून घेतली. त्यात हृदयाशी संबधित काही चाचण्या केल्या असता, त्यांच्या रक्तवाहिनीत एक ब्लॉक आढळून आला आहे. त्यानंतर त्यांनी तातडीने या नगरसेवकाने उपचार घेण्यास सुरुवात केली आहे. त्यामुळे नगरसेवकांमध्ये असलेल्या तणावाचा मुद्दा पुन्हा एकदा ऐरणीवर आला आहे.