आर्चीला मिळणार दहा गुण एक्स्ट्रा

सोलापूर : ‘सैराट’ फेम आर्ची अर्थात रिंकू राजगुरूचा दहावीचा निकाल जाहीर झाला आहे. आता तिला मिळालेल्या गुणांमध्ये दहा गुण अधिक मिळणार आहेत. रिंकूला दहावीच्या परीक्षेत 66.40 % गुण मिळाले आहेत. मात्र आता तिला मिळालेल्या गुणांमध्ये आणखी 10 गुणांची वाढ होणार आहे. राष्ट्रपती पुरस्कार मिळाल्यामुळे तिला हे वाढीव गुण मिळणार आहेत. आर्चीला सैराट सिनेमातील भूमिकेबद्दल राष्ट्रपतींच्या हस्ते पुरस्कार मिळाला होता. ज्या विद्यार्थ्याला राष्ट्रीय पुरस्कार मिळतो, त्याला विशेष गुण मिळतात. हे वाढीव 10 गुण रिंकू राजगुरुला मिळाले नव्हते. ते आता देण्याचे बोर्डाने मान्य केले आहे.

दरम्यान, ‘आर्ची’च्या गुणपत्रिकेत कला श्रेणीतील 5 गुण मिळाले होते. मात्र हे गुण चित्रकलेसाठी मिळाले होते. व्यावसायिक सिनेमा कला श्रेणीत मोडत नसल्याचा बोर्डाचा निकष असल्याचे सांगण्यात येत होते. त्यामुळेच रिंकूला हे गुण दिले नव्हते. पण अभिनयासाठी राष्ट्रीय स्तरावर पुरस्कार मिळवणार्‍या बालकलाकाराला अतिरिक्त दहा गुण देण्याचा जीआर याच वर्षी जानेवारी 2017 मध्ये काढण्यात आला होता.