आवास योजनेच्या गृहप्रकल्पास 84 कोटीचा खर्च

पिंपरी : पिंपरी-चिंचवड महापालिकेचा पंतप्रधान आवास योजनेंतर्गत आकुर्डी, पिंपरी येथे आर्थिकदृष्ट्या दुर्बल घटकांसाठी घरे बांधण्याचा मार्ग मोकळा झाला आहे. या घरांसाठी निविदा प्रक्रियेतील स्पेसिफिकेशनमध्ये फेरबदल करून निविदा मागविल्यानंतर या दोन्ही प्रकल्पांसाठी 84 कोटी 32 लाख रुपये लघुत्तम दर सादर केलेल्या एकाच ठेकेदाराला हे काम देण्याचा निर्णय घेण्यात आला आहे. याबाबतच्या प्रस्तावाला शुक्रवारी झालेल्या स्थायी समितीच्या बैठकीत मान्यता देण्यात आली. केंद्र सरकारमार्फत सर्वांसाठी घरे – 2022 या संकल्पनेवर आधारित पंतप्रधान आवास योजना अभियान राबविण्यात येत आहे. महापालिका मंजूर विकास आराखड्यात शहरात वेगवेगळ्या ठिकाणी आर्थिकदृष्ट्या दुर्बल घटकांसाठी (ईडब्ल्यूएस) आणि बेघरांसाठी घरे (एचडीएच) या योजनांसाठी जागांची आरक्षणे आहेत. या जागा ताब्यात आल्यानंतर त्याठिकाणी पंतप्रधान आवास योजनेंतर्गत घरे बांधण्याचे नियोजन करण्यात येत आहे. शहराच्या विविध भागात 10 ठिकाणी 9 हजार 458  सदनिका बांधण्याचे नियोजन आहे.

आकुर्डी येथील आरक्षण क्रमांक 283 येथील बेघरांसाठी घरे या आरक्षित जागेवर आर्थिकदृष्ट्या दुर्बल घटकांसाठी 568 घरे बांधण्यासाठीच्या सविस्तर प्रकल्प अहवालाला केंद्र सरकारच्या केंद्रीय मान्यता व सनियंत्रण समितीने 7 फेब्रुवारी 2018 रोजी मान्यता दिली. त्यानुसार, महापालिकेने या कामांसाठी निविदा मागविल्या. सुरुवातीला बांधकामाचा अंदाजित खर्च 54 कोटी 80 लाख रुपये अपेक्षित धरण्यात आला. पिंपरीतील आरक्षण क्रमांक 77 येथील घरांसाठी 15 जून 2018 रोजी निविदा मागविण्यात आल्या. या बांधकामाचा अंदाजित खर्च 35 कोटी 68 लाख रुपये अपेक्षित धरण्यात आला. 15 जुलै 2018 रोजी निविदा सादर करण्याची मुदत ठेवण्यात आली. महापालिकेमार्फत दर कमी करण्याबाबत पत्राद्वारे विचारणा केली असता ठेकेदाराने या कामासाठी दिलेला मूळ दर मान्य करण्याबाबत कळविले. त्यानुसार, नटवर कन्स्ट्रक्शन यांच्यामार्फत दोन्ही प्रकल्पांसाठी सादर केलेला 84 कोटी 32 लाख रुपये दर अधिक रॉयल्टी आणि मटेरियल टेसिंटग चार्जेससह काम करून घेण्यात येणार आहे. याबाबतच्या प्रस्तावाला स्थायीच्या बैठकीत मान्यता देण्यात आली.