आश्‍वासनानंतरही कुंभार समाजाला आरक्षण न मिळाल्याने राज्य सरकारवर टिकेची झोड

मुक्ताईनगरात कुंभार समाजाचा राज्यस्तरीय मेळावा ; हुंडा देणे-घेणे टाळण्यासह समाजाला आरक्षण मिळण्यासाठी लढा उभारण्याबाबत ठरावाला मंजुरी

मुक्ताईनगर- मुक्ताईनगर तालुका कुंभार समाज संघटनेतर्फे राज्यस्तरीय कुंभार समाजाचा मेळावा तसेच विद्यार्थ्यांचा गुणगौरव सोहळा व समाजातील पुरस्कारार्थी मान्यवरांचा गौरव सोहळा सोमवारी मुक्ताईनगर येथील सुराणा नगर परीसरात झाला. राज्य शासनाने आश्वासन देऊनदेखील कुंभार समाजाला आरक्षण न दिल्याचा रोषही मेळाव्याप्रसंगी व्यक्त करण्यात आला. मेळाव्याच्या अध्यक्षस्थानी फेकरीचे सरपंच प्रभाकर सोनवणे 2होते. कार्यक्रमाला प्रमुख अतिथी म्हणून नगराध्यक्ष नजमा तडवी, जिल्हा शिवसेना प्रमुख चंद्रकांत पाटील, डॉ.जगदीश पाटील, जळगाव जिल्ह्याचे कुंभार समाजाचे अध्यक्ष चंद्रशेखर कापडे, लेखक निंबाजी हिवरकर, प्रभाकर कापडे, भोई समाजाचे जिल्हाध्यक्ष एस.ए.भोई, धनलाल शिरसाट, बबनराव जगदाळे, सुरेश बहाळकर, सखाराम मोरे, सुभाष पंडित, राहुल कुंभार, तालुका अध्यक्ष रामभाऊ पुन्नासे हे प्रमुख मान्यवर व्यासपीठावर उपस्थित होते.

या ठरावांना मेळाव्यात मिळाली मंजुरी
समाजाला आरक्षण मिळवण्यासाठी नवतरुणांची संघटना उभारणे व आरक्षणाचा लढा नव्याने सुरू करणे, वीटभट्टी यांचे नैसर्गिक आपत्तीने नुकसान झाल्यावर शेतकर्‍यांप्रमाणे एक हजार विटामागे 1500 रुपये अनुदान देणे, व्यवसायासाठी चार टक्के दराने वीस लक्ष रुपये कर्ज देणे व शेतकर्‍यांप्रमाणे 25 टक्के सबसिडी देणे , पोटशाखा बंद करून रोटी बेटीव्यवहार पाळणे, वधू-वर परिचय मेळावे सुरू करणे, पदाची अभिलाषा न ठेवता समाजकार्य करणे, हुंडा घेणार नाही व देणारही नाही , एक दिवसाचा विवाह कार्यक्रम ठरवणे, विवाह संस्था सैराट होऊ न देणे, शिक्षणाचा प्रसार करणे, व्यावसायीकांना विवाहासाठी मुली उपवर मुली देणे यासारखे ठराव याप्रसंगी करण्यात आले.

आरक्षणासाठी लढा उभारण्याची गरज -प्रभाकर सोनवणे
प्रभाकर सोनवणे म्हणाले, की स्मशानभूमीत व नद्यांच्या काठावर राहणारा कुंभार समाज हा अतिशय मेहनती समाज आहे. समाजासाठी यापूर्वी नेमण्यात आलेला वझे आयोग हा चुकीचा होता म्हणून समाजाला आरक्षण मिळाले नाही. त्यासाठी आरक्षण मिळण्यासाठी लढा उभारण्याची गरज असून जुन्या-जाणत्या नेत्यांनी मार्गदर्शन करावे व नवंतरुणांची फळी तयार करून आरक्षणाचा लढा सुरू ठेवावा, असेही ते म्हणाले. निवडणुकीपूर्वी आरक्षणाच्या आश्वासन देणार्‍या शासनाचा निषेधही याप्रसंगी व्यक्त करण्यात आला.

वयोवृद्ध महिलेने म्हटला अभंग
सुमनबाई सोनवणे या वयोवृद्ध आजींनी व्यासपीठावर येऊन मुंबईला विधान भवनावर कुंभार समाजाचा मोर्चा न्या व आरक्षण हा आपला हक्क असून तो पदरात पाडून घ्या, असे आवाहन करत संत गोरोबा कुंभार यांच्या जीवनावर अभंग गायले. किरण कुंभार यांनी तयार केलेल्या समाजाच्या अ‍ॅपचे उद्घाटन देखील याप्रसंगी करण्यात आले तर प्रभाकर कापडे यांनी अनाथ आणि समाजातील अनाथ मुले दत्तक घेत त्यांच्यासाठी अनाथ आश्रम सुरू करण्याची घोषणा केली. सूत्रसंचालन सुरेश अर्जुन बोरसे यांनी तर आभार सरदार सर यांनी मानले. यशस्वीतेसाठी रामभाऊ कुंभार, नारायण पुनासे, भगवान हिवरकर, गणेश न्हावकर, अनिल मोरे, रवींद्र सोनवणे, उमेश खानजोडे, अमोल मोरे, संगीता न्हावकर, नीलिमा बागुल, रीता सोनवणे यांनी परीश्रम घेतले.