आ. एकनाथराव खडसेंचे बुरे दिन सुरूच!

मुंबई :- भाजपचे ज्येष्ठ नेते आ. एकनाथराव खडसे यांच्या मंत्रिमंडळात येण्याच्या शक्यता वाढत असताना दुसरीकडे मात्र त्यांच्या अडचणी पिच्छा सोडत नसल्याचे चित्र आहे. एकनाथराव खडसेंवरील बेहिशेबी मालमत्तेच्या आरोपांबाबत काय कारवाई केली? असा सवाल मुंबई हायकोर्टाने राज्य सरकारला विचारला आहे. यामुळे आ. एकनाथराव खडसे यांच्या अडचणीत आणखी वाढ होण्याची शक्यता निर्माण झाली आहे. दुसरीकडे या आरोपांमध्ये काहीही तथ्य नसून पुरावे कोर्टासमोर ठेवल्यानंतर ते स्पष्ट होईल असे खडसे यांनी जनशक्तिशी बोलताना सांगितले.

दमानियांच्या याचिकेवर सुनावणी
माजी महसूलमंत्री एकनाथ खडसे आणि त्यांच्या कुटुंबियांविरोधात बेहिशेबी मालमत्तेचे आरोप करत सामाजिक कार्यकर्त्या अंजली दमानिया यांनी मुंबई हायकोर्टात फौजदारी याचिका दाखल केली आहे. मुंबई हायकोर्टात शुक्रवारी दमानिया यांच्या याचिकेवर सुनावणी झाली. राज्य सरकारने खडसेंवरील बेहिशेबी मालमत्तेच्या आरोपांबाबत काय कारवाई केली अशी विचारणा हायकोर्टाने सरकारला केली. हायकोर्टाकडून विचारणा झाल्याने एकनाथ खडसे यांच्या अडचणी पुन्हा वाढल्या आहेत.

मंत्रिमंडळ प्रवेशाला खोडा?
पुण्यातील भोसरीमधील जमीन खरेदीप्रकरणी एकनाथराव खडसे अडचणीत आले होते. जमीन खरेदीच्या या प्रकरणामुळे खडसेंना मंत्रिपदाचा राजीनामा द्यावा लागला होता. याप्रकरणाच्या चौकशीसाठी राज्य सरकारने माजी न्यायमूर्ती दिनकर झोटिंग यांची एकसदस्यीय समिती नेमली होती. या समितीने काही दिवसांपूर्वीच राज्य सरकारला अहवाल दिला आहे. मात्र खडसेंविरोधात फौजदारी कारवाईची शिफारस समितीने केली नसल्याची माहिती असल्याने खडसेंना मोठा दिलासा मिळाला होता. खडसेंचे मंत्रिमंडळात पुनरागमन होणार अशी चर्चाही पुन्हा सुरु आहे मात्र कोर्टाच्या या प्रश्नाचे पुन्हा गंडांतर येण्याची शक्यता आहे. आता बेहिशेबी मालमत्तेच्या प्रकरणामुळे खडसेंच्या अडचणी पुन्हा वाढल्या आहेत.

या आरोपांमध्ये काहीही तथ्य नाही. आरोप अत्यंत बोगस आहेत. पुरावे कोर्टासमोर सादर केल्यानंतर तथ्य समोर येईलच.
आ. एकनाथराव खडसे
ज्येष्ठ नेते, भाजप