इंटरनेट होणार हायस्पीड

अहमदाबाद : देशातील इंटरनेट सेवा अधिक वेगवान करण्यासाठी इस्त्रोकडून तीन उपग्रह सोडले जाणार आहेत. जीसॅट-19, जीसॅट-11 आणि जीसॅट-20 या तीन उपग्रहांचे प्रक्षेपण पुढील 18 महिन्यांमध्ये इस्त्रोकडून करण्यात येणार आहे. या तीन उपग्रहांच्या प्रक्षेपणामुळे टीव्ही आणि स्मार्टफोन क्षेत्रात मोठे बदल घडणार आहेत. विशेष म्हणजे इस्त्रोकडून सोडल्या जाणार्‍या उपग्रहांचा वापर स्मार्ट सिटी प्रकल्पांमधील संपर्क यंत्रणेसाठी केला जाणार आहे.

जीसॅट-19 चे प्रक्षेपण जूनमध्ये करण्यात येणार आहे. हा जीसॅट-19 उपग्रह दूरसंचार यंत्रणेतील सक्षमीकरणात महत्त्वाची भूमिका बजावणार आहे. यामुळे देशातील दूरसंचार व्यवस्था अधिक वेगवान होईल, अशी माहिती अहमदाबादमधील स्पेस अ‍ॅप्लिकेशन्स सेंटरचे (एसएसी) तपन मिश्रा यांनी दिली. संपर्क क्षेत्रात व्हॉईस आणि व्हिडीओमुळे झालेला बदल सगळेच अनुभवत आहेत. मात्र येत्या काळात इंटरनेटच्या माध्यमातून वायरलेस तंत्रज्ञानाने टीव्ही पाहता येणार आहे. इस्त्रोकडून करण्यात येणार्‍या क्षेपणास्त्रांच्या प्रक्षेपणामुळे भविष्यात हे सर्व शक्य होणार आहे, असेदेखील मिश्रा यांनी म्हटले आहे.

येत्या 18 महिन्यांमध्ये इस्त्रोकडून 3 उपग्रहांचे प्रक्षेपण केले जाणार आहे. यामुळे दूरसंचार क्षेत्रात मोठे बदल होणार आहेत. इस्त्रोकडून करण्यात येणार्‍या उपग्रहांच्या प्रक्षेपणामुळे दूरसंचार क्षेत्रात क्रांती घडणार आहे. दूरसंचार क्षेत्रासाठी उपग्रहांचे प्रक्षेपण केले जात असल्याने इंटरनेट सेवा वेगवान आणि स्वस्त होणार आहे. जीसॅटमुळे इंटरनेटचा सध्याचा वेग 1 गिगाबाईट प्रति सेकंद इतका आहे. जीसॅट-19 मुळे हा वेग 4 गिगाबाईट प्रति सेकंद इतका होईल. म्हणजे जीसॅट-19 या उपग्रहाची क्षमता सध्याच्या उपग्रहाच्या तुलनेत चारपटीने अधिक असेल, असेही तपन मिश्रा यांनी सांगितले.

जीसॅट-11 हा इस्त्रोचा सर्वाधिक वजनदार उपग्रह असणार आहे. जानेवारी 2018 मध्ये इस्त्रोकडून जीसॅट-11 चे प्रक्षेपण करण्यात येणार आहे. यामुळे इंटरनेटचा वेग 14 गिगाबाईट प्रति सेकंदावर जाऊन पोहोचणार आहे. तर जीसॅट-20 चे प्रक्षेपण पुढील वर्षाच्या अखेरीस प्रक्षेपित करण्यात येईल. या उपग्रहाच्या माध्यमातून संपूर्ण देशभरातील इंटरनेटचे जाळे अधिकाधिक घट्ट करण्यात येणार आहे. त्यामुळे इंटरनेटचा वेग थेट 70 गिगाबाईट प्रति सेकंदावर जाईल. यामुळे स्मार्ट सिटीतील दूरसंचार यंत्रणा अधिक मजबूत होईल, असे मिश्रा यांनी सांगितले.