इंदुरीकर महाराजांच्या कीर्तनावर अगोदरच चर्चा करायला हवी होती: डॉ. सदानंद मोरे

पुणे: गेल्या काही दिवसापासून निवृत्ती महाराज देशमुख यांच्या कीर्तनावरून वाद सुरु आहे. निवृत्ती महाराज देशमुख यांच्या कीर्तनावर संत तुकाराम महाराजांचे वंशज व संतसाहित्याचे गाढे अभ्यासक डॉ. सदानंद मोरे यांनी आपले मत मांडले आहे. ‘महाराष्ट्राला कीर्तन, प्रवचनाची मोठी परंपरा लाभली असून त्यात इंदोरीकरांचे कीर्तन बसत नाही. त्यांचे विनोदही कमी दर्जाचे असतात. खरंतर त्यांच्या कीर्तनावर यापूर्वीच चर्चा व्हायला हवी होती,’ असं परखड मत त्यांनी मांडले आहे.

‘सम तिथीला स्त्री संग केल्यास मुलगा होतो, तर विषम तिथीला स्त्री संग केल्यास मुलगी होते,’ असं वक्तव्य इंदुरीकर महाराजांनी ओझर येथे झालेल्या एका कीर्तनात केलं होतं. त्यावरून महाराष्ट्रात वादाचं मोहोळ उठलं आहे. अंधश्रद्धा निर्मूलन समितीसह काही महिला संघटनांनी इंदुरीकरांविरुद्ध पोलिसांत तक्रार करून गुन्हा दाखल करण्याची मागणी केली आहे. त्यांच्यावर टीकाही होत आहे. दुसरीकडं काही संघटना त्यांच्या समर्थनार्थ रस्त्यावर उतरल्या आहेत. अनेक राजकीय पक्षांनीही त्यांना पाठिंबा दिला आहे. या पार्श्वभूमीवर सदानंद मोरे यांनी आपलं मत मांडलं आहे.

‘मी गेले ५०-५५ वर्षे कीर्तन ऐकतो आहे. मामासाहेब दांडेकर व त्यांच्याही आधीच्या कीर्तनकारांची कीर्तनं मी ऐकली आहेत. पण अशा प्रकारचे विनोद पूर्वी कोणाच्याही कीर्तनात नव्हते. ही लाट अलीकडेच आली आहे. हल्ली लोकप्रिय कीर्तनकारांच्या नावामागे विनोदमूर्ती किंवा विनोदाचार्य असं लिहितात. विनोदाचार्य हे काही कीर्तनकाराचं विशेषण नाही,’ असं मोरे म्हणाले.