इंधन दरवाढीविरोधात निदर्शने

पुणे । पेट्रोल, डिझेल आणि गॅस सिलेंडरच्या भाव वाढीच्या निषेधार्थ पुणे शहर जिल्हा काँग्रेस कमिटी पर्वती विधानसभा मतदार संघातर्फे गुरुवारी सातारा रस्त्यावरील उत्सव चौकात निदर्शने करण्यात आली. याप्रसंगी अध्यक्ष रमेश बागवे, सरचिटणीस अ‍ॅड. अभय छाजेड, बंडू नलावडे, द. स. पोळेकर, अनुसया गायकवाड आदी उपस्थित होते.

सर्व आघाड्यांवर अपयश
बागवे म्हणाले, हे सरकार विश्‍वासघातकी असून लोकांना दिलेला एक ही शब्द त्यांनी पाळलेला नाही. सर्व आघाड्यांवर हे सरकार अपयशी ठरले असून पेट्रोल, डिझेल व घरगुती गॅसच्या दरात भाव वाढ करून लोकांवर बोजा वाढविलेला आहे. महागाईमुळे जनता त्रस्त झालेली असून ही दरवाढ तातडीने मागे घ्यावी अन्यथा शहरामधील सर्व मतदार संघामध्ये शहर काँग्रेसच्या वतीने निदर्शने आयोजित करण्यात येतील.

सामान्यांवर बोजा का?
ही दरवाढ जनतेची लूट असून जीएसटीमध्ये जर मोठ्या प्रमाणावर उत्पन्न आल्याचे केंद्रीय अर्थमंत्री अरुण जेटली सांगत असतील तर सामान्य माणासाला आतंरराष्ट्रीय बाजारात क्रुड ऑइलचे दर कमी झालेले असताना हा बोजा कशासाठी? महाराष्ट्र सरकारने दुष्काळावर बसवलेला सेस तसेच सुप्रिम कोर्टाने दिलेल्या निर्णयामुळे दारूच्या उत्पन्नांवर झालेल्या घटीमुळे बसवलेला सेस अजून का कमी केलेला नाही. असा प्रश्‍न अ‍ॅड. छाजेड यांनी उपस्थित केला.