इजिप्तमध्ये भीषण अपघात; भारतीय प्रवाश्यासह २८ जण ठार !

सूझ: इजिप्तमध्ये प्रवाशी बसचा भीषण अपघात झाला यात २८ जणांचा मृत्यू झाला आहे. मृतांमध्ये एक भारतीय पर्यटकाचाही समावेश आहे. याशिवाय १६ भारतीय पर्यटक जखमीही झाले आहेत. सूझ शहरातील हॉस्पिटलमध्ये या पर्यटकांवर उपचार सुरु आहे. भारतीय दूतावासाच्या अधिकाऱ्यांनी घटनास्थळी धाव घेतली. सूझ शहर आणि कैरो येथील दोन संपर्क क्रमांकही जारी करण्यात आले आहेत. इजिप्तमध्ये पर्यटकांना घेऊन जाणाऱ्या बसला भीषण अपघात झाला असून त्यामध्ये १६ भारतीय पर्यटक जखमी झाल्याचे भारतीय दूतावासाने सांगितले आहे.

दोन वेगवेगळ्या अपघातांत जवळपास २८ जण ठार झाले असून यामध्ये एका भारतीयाचा समावेश आहे. पहिल्या अपघातात टेक्सटाईल कामगारांना घेऊन जाणारी बस एका कारवर आदळली. यामध्ये सहा जण ठार झाले. तर, दुसऱ्या अपघातात पर्यटकांना घेऊन जाणाऱ्या दोन बस समोरून येणाऱ्या ट्रकवर आदळल्या. यामध्ये २२ जण ठार झाले. यामध्ये एका भारतीय पर्यटकाचाही समावेश आहे, असे वैद्यकीय अधिकाऱ्यांनी सांगितले. तर १६ भारतीयांसह २४ जण जखमी झाल्याचे भारतीय दूतावासाने सांगितले आहे. अद्याप मृत्यूमुखी पडलेल्या भारतीयाबाबत कोणतीही माहिती दूतावासाने दिलेली नाही.