इफ्फीमधून रवी जाधवचा न्यूड चित्रपट वगळला

नावावर केंद्र सरकारचा नावावर आक्षेप

मुंबई : रवि जाधव दिग्दर्शित न्यूड या सिनेमाला 48 व्या इंटरनॅशनल फिल्म फेस्टिव्हलमधून (इफ्फी) वगळण्यात आले आहे. तेरा ज्युरी मेंबर्सनी 24 सिनेमांची इंडियन पॅनोरमा विभागासाठी निवड केली होती. पॅनारोम विभागात न्यूड सिनेमाचे स्क्रीनिंग होणार होते. परंतु, सिनेमाच्या नावावर आक्षेप घेत माहिती व प्रसारण मंत्रालयाने जारी केलेल्या यादीतून या सिनेमाला वगळण्यात आले आहे.

ज्युरी मेंबर्स नाराज
ज्युरी मेंबर्सचा सल्ला न घेता हा मोठा बदल करण्यात आला आहे. ज्युरीपैकी एक असणार्‍या अपूर्वा असराणी यांनी केंद्राच्या या निर्णयावर नाराजी व्यक्त केली आहे. ज्युरी मेंबर्सने केंद्र सरकारला इमेल पाठवून सिनेमा वगळण्याचे कारण विचारले आहे. यासंदर्भात अपूर्वा असराणी म्हणाल्या, कालपर्यंत मला सिनेमा यादीतून वगळल्याची माहिती नव्हती. फेडरेशनकडे मी यासंदर्भात लेखी नाराजी व्यक्त केली आहे. या सिनेमातून महिलेला अत्यंत सन्मानाची आणि आदराची वागणूक दिली गेली आहे. त्यामुळे मंत्रालय त्यांच्या निर्णयावर फेरविचार करून ज्युरीचा निर्णय कायम ठेवेल, अशी आशा आहे.

सिनेमाचे नाव वगळणे रूचले नाही
यासंदर्भात दिग्दर्शक रवि जाधव यांनी प्रतिक्रिया दिली की, न्यूड हा सिनेमा न्यूड मॉडेल म्हणून काम करणार्‍या एका तरूण स्त्रीच्या जीवनावर आधारीत आहे. सिनेमाची इफ्फीतील स्क्रीनिंगसाठी निवड झाल्याचे वाटले होते. केंद्राच्या या निर्णयामुळे माझी निराशा झाली आहे. ज्युरी जो निर्णय घेतो तो अंतिम असतो, असे माझे व्यक्तिगत मत आहे. पण ज्युरी मेंबरला कल्पना न देता सिनेमाचे नाव वगळणे, कुणालाही रूचणार नाही. निर्णय घेताना ज्युरीला कल्पना द्यायला हवी होती. सिनेमामध्ये काहीही आक्षेपार्ह नाही.

एस. दुर्गालाही इफ्फीतून वगळले
न्यूड सिनेमाव्यतिरिक्त मल्ल्याळम सिनेमा एस. दुर्गाला सुद्धा इफ्फीतून वगळण्यात आले आहे. या सिनेमातून समाजामधील वास्तव ठळकपणे मांडण्याचा प्रयत्न करण्यात आला आहे. या सिनेमाचे दिग्दर्शन सनलकुमार ससिधरन यांनी केले आहे. माहिती व प्रसारण मंत्रालयाने जारी केलेल्या यादीत या सिनेमाचे नाव नाही.