ईडीच्या जागेवर बेकायदा गृहप्रकल्प

पुणे । इनफोर्समेंट डायरेक्टोरेट डिपार्टमेंट (ईडी) ने 2013 साली जप्त केलेल्या जमिनीची सरकारी नोकरदारांनीच दोनवेळा बेकायदेशीररित्या विक्री केली आहे. त्यामुळे हा व्यवहार करणार्‍या मुळशी व पौड येथील दोन दुय्यम निबंधक, बांधकाम व्यावसायिकांसह आठ जणांवर हिंजवडी पोलीस ठाण्यात ईडीने फसवणुकीचा गुन्हा दाखल केला आहे. सय्यद मोहम्मद मसुद, साजीद इब्राहिम वारेकर, गुड्डू शेख, प्रवीण रामचंद्र गुरव, साहिल रिअ‍ॅल्टर्स, हिंदवी स्वराज्य ट्रेडींग प्रा. लि., मुळशी-2 दुय्यम निबंधक कार्यालय, पौड दुय्यम निबंधक कार्यालय यांच्या विरोधात फसवणुकीचा गुन्हा ईडीने दाखल केला आहे.

दोनवेळा जमिनीची निबंधक कार्यालयात नोंद
पोलिसांनी दिलेल्या माहितीनुसार, ईडीने 15 जुलै 2013 साली सर्व्हे नंबर 220 हिस्सा क्रमांक 1 व 5/5 ता. मुळशी येथे 83 हेक्टर ही मिळकत जप्त केली. हे माहिती असूनही सय्यद मसूद याने ती जमीन साजिद इब्राहिम वारेकर, गुड्डू शेख, प्रवीण रामचंद्र गुरव, साहिल रिअ‍ॅल्टर्स, हिंदवी स्वराज्य ट्रेडींग प्रा. लि. यांना विकली. यासाठी दुय्यम निबंधकाशी संगनमत केले. दोनवेळा या जमिनीची निबंधक कार्यालयाच्या रजिस्टरवर नोंद केली. ही जमीन ईडीची आहे माहिती असून सुद्धा हिंदवी स्वराज्य ट्रेडींग प्रा.लि. चे संचालक प्रवीण गुरव यांनी तेथे उत्कर्ष गृहप्रकल्प उभारला.

कुटुंबांचीदेखील फसवणूक
या प्रकल्पामध्ये असलेले 100 फ्लॅट हिंजवडी येथे सॉफ्टवेअर कंपनीत काम करणार्‍या अभियंत्यांनी विकत घेतले आहेत. त्यामुळे केवळ सरकारची नाही तर या कुटुंबांचीदेखील ही फसवणूक झाली आहे. याप्रकरणी हिंजवडी पोलीस ठाण्यात आठ जणांविरोधात फसवणूक तसेच भ्रष्टाचार प्रतिबंधक कायद्याअंतर्गत गुन्हा दाखल करण्यात आला आहे. या प्रकरणाचा पुढील तपास चतुःश्रृंगी विभागाचे सहायक पोलीस आयुक्त विक्रम पाटील करीत आहेत.