ई-वे बिलिंगचा शहरातील व्यापारी, उद्योजकांनी घेतला धसका

जीएसटी कार्यालयामार्फत अद्याप जनजागृतीच नाही!

पिंपरी-चिंचवड : केवळ नाममात्र बिल घेऊन जिल्हा, राज्य आणि देशात व्यवहार करणार्‍या व्यापारी-उद्योजकांनी मोठ्या प्रमाणात करचोरी केल्याचे समोर आले आल्यानंतर, अशा करबुडव्यांवर अंकुश ठेवण्यासाठी ‘ई-वे बिलिंग’ यंत्रणा केंद्र सरकारने आणली आहे. अशा करबुडव्यांवर आता जीएसटी अधिकार्‍यांमार्फत कारवाई केली जाणार आहे. येत्या फेब्रुवारी महिन्यापासून ‘ई-वे बिलिंग’ सक्तीचे करण्यात आले असून, त्यामुळे व्यापारी-उद्योजकांच्या मनात धडकी भरली आहे. मात्र, त्याबाबत जीएसटी कार्यालयातर्फे अद्यापही जनजागृतिपर कार्यक्रम घेण्यात आलेला नाही, अशी बाबही निदर्शनास आली आहे.

अधिकार्‍यांकडून होणार अचानक तपासणी
50 हजार रुपये किमतीवर असलेल्या मालासाठी ‘ई-वे बिलिंग’ आवश्यक राहणार असून, ‘ई-वे बिलिंग’चे दोन भाग केले आहेत. जर ‘ई-वे बिलिंग’ फाइलिंग झालेले नसेल, तर जीएसटी इनव्हॉइसच्या दोनशेपट दंड ठोठाविला जाणार आहे. त्यामुळे ‘ई-वे बिलिंग’संदर्भात व्यापारी-उद्योजकांमध्ये प्रचंड भीती निर्माण झाली आहे. हे ‘ई-वे बिलिंग’ फेब्रुवारीपासून सक्तीचे करताना, त्याच महिन्यापासून जीएसटी अधिकार्‍यांकडून व्यापारी-उद्योजक यांची अकस्मात तपासणीदेखील होण्याची शक्यता आहे. अवघ्या 15 दिवसांनंतर ‘ई-वे बिलिंग’ची प्रक्रिया संपूर्ण देशात तीव्र होणार आहे. त्यामुळे व्यापार्‍यांनी काय करावे अन् काय करू नये, याबाबत कळत नसल्याने त्यांच्यामध्ये संभ्रमावस्था निर्माण झाली आहे.

वेगवेगळ्या मुदतीचे मिळणार ई-वे बिलिंग!
‘ई-वे बिलिंग’ हे सप्लायर, रिसिव्हर आणि जीएसटी नोंदणीकृत कंपन्यांकडून विकत घेणार्‍या अथवा विकणार्‍या कंपनी किंवा व्यक्तीला आवश्यक आहे. रिजेक्शन, सेल रिटर्न, रिपेअर-सांभाळ करणार्‍यांनाही ते गरजेचे असणार आहे. एका भागात गुडस् रिसिव्हर, साहित्य, त्याच्या किमतीचा संदर्भ असणार आहे; तर दुसर्‍या भागात वाहतुकीची माहिती, वाहन क्रमांक आणि जीआर क्रमांकाचा समावेश असणार आहे. एका वाहनातून जर विविध प्रकारचे साहित्य वाहून नेले जात असेल, तर वाहनचालकाकडे कॉन्सिलिडेटेट ई-वे बिलिंग असणे गरजेचे आहे. शून्य ते शंभर किलोमीटर अंतरासाठी एक दिवस ‘ई-वे बिलिंग’ची मुदत राहील. तीनशे किलोमीटरपर्यंत तीन दिवस, पाचशे किलोमीटरपर्यंत पाच दिवस, हजार किलोमीटरपर्यंत पंधरा दिवस मुदत राहणार आहे.