ई-स्कॉलरशीप पोर्टल सुरू

मुंबई । मागासवर्गीय विद्यार्थ्यांना सन 2015-16 व 2016-17 मधील प्रलंबित शिष्यवृत्ती अदा करण्यासाठी ई-स्कॉलरशीप पोर्टल पुन्हा सुरू करण्यात आले आहे. सामाजिक न्याय विभागामार्फत मागासवर्गीय विद्यार्थ्यांना शिष्यवृत्ती/शिक्षण फी, निर्वाह भत्ता, विद्यावेतन इत्यादी योजनेच्या माध्यमातून आर्थिक लाभ दिला जातो. सन 2017-18 या वर्षापासून राज्य शासनाने सर्व विभागाच्या सर्व प्रकारच्या शिष्यवृत्त्या या महा-डिबीटी पोर्टलमार्फत अदा करण्याचा निर्णय घेतला असल्यामुळे सामाजिक न्याय विभागाचे  http://mahaeschol.maharashtra.gov.in हे संकेतस्थळ संस्थगित करण्यात आलेले आहे. काही विद्यार्थ्यांची शिष्यवृत्ती/शिक्षण फी/परीक्षा फी/विद्यावेतन/निर्वाह भत्ता इत्यादी लाभ देण्याचे प्रलंबित असल्याने तो अदा करण्यासाठी आता ई-स्कॉलरशीप हे संकेतस्थळ 21 नोव्हेंबर 2017 पासून पुन्हा मर्यादित कालावधीसाठी सुरू करण्याचा निर्णय शासनाने घेतला आहे.

प्रथम टप्प्यामध्ये ज्या विद्यार्थ्यांनी सन 2015-16 साठी 31 मार्च 2016 साठी सन 2016-17 करिता 31 मार्च 2017 पर्यंत ऑनलाईन अर्ज भरलेले आहेत. परंतु ज्यांना अद्याप शिष्यवृत्ती, शिक्षण फी, परीक्षा इत्यादींचा लाभ मिळालेला नाही, अशा विद्यार्थ्यांचे महाविद्यालयाकडे प्रलंबित असलेले अर्ज, नूतनीकरण करावयाचे प्रस्ताव महाविद्यालयांनी पुनरूज्जीवीत करण्यात आलेल्या संकेतस्थळावरून 21 नोव्हेंबर ते 30 नोव्हेंबर 2017 या कालावधीत संबंधित सहाय्यक आयुक्त, समाज कल्याण, यांच्याकडे पाठवावेत. याबाबत सूचना असलेले परिपत्रक, वेळापत्रक विभागाच्या www.sjsa.maharashtra.gov.in या संकेतस्थळावर उपलब्ध करून देण्यात आलेले आहे. महाविद्यालयांनी त्यांच्याकडे विद्यार्थ्यांचे ऑनलाईन सादर केलेले सन 2015-16 व 2016-17 चे पात्र विद्यार्थ्यांचे प्रलंबित आणि नुतनीकरणाचे प्रस्ताव त्वरेने सादर करावेत, असे आवाहन सहाय्यक आयुक्त, समाज कल्याण, मुंबई शहर व मुंबई उपनगर यांनी केले आहे.