एकदिवसीय सामन्यात गोलंदाजांचा अपेक्षेइतका प्रभाव नाही

कोलकाता : इंग्लंडविरुद्धच्या एकदिवसीय सामन्यात गोलंदाजांना अपेक्षेइतका प्रभाव दाखविता आला नव्हता. गोलंदाजांच्या प्रभावहीन कामगिरीमुळे इंग्लंडला आम्ही तीनशे आत एकदाही रोखू शकलो नाहीत. ट्वेन्टी२० सामन्यात आमच्या गोलंदाजांना प्रभाव दाखविण्याची चांगली संधी आहे व तेथेच त्यांची खरी कसोटी ठरणार आहे, असे भारतीय क्रिकेट संघाचा कर्णधार विराट कोहलीने सांगितले. एकदिवसीय पेक्षाही २० ट्वेंटी सामने हे गोलंदाजांसाठी खतरनाक मानले जातात, यासाठी पुरेपूर तयारी करणे आवश्यक असल्याचे कोहलीने सांगितले. एकदिवसीय तीन सामन्यांच्या मालिकेत भारताला २-१ असा विजय मिळाला. शेवटच्या सामन्यात त्यांना केवळ पाच धावांनी पराभव स्वीकारावा लागला.

तंत्रात थोडीशी सुधारणा करावी लागणार
कोहली म्हणाला, ‘ट्वेन्टी-२० व एकदिवसीय सामने हे कसोटी सामन्यांचाच उपभाग आहे. मात्र या सामन्यांमध्ये आमच्या संघातील काही खेळाडूंना फलंदाजीच्या तंत्रात थोडीशी सुधारणा करावी लागणार आहे. आम्हाला इंग्लंडमध्ये चॅम्पियन्स स्पर्धेत खेळायचे आहे. तेथील वातावरण, खेळपट्टय़ांचे रागरंग आदी गोष्टी लक्षात घेता आम्हाला आमच्या शैलीत काही बदल करावे लागतील. यासाठी संघ व्यवस्थापनाकडून विशेष लक्ष दिले जात असून या मालिकेत प्रभावी गोलंदाजी करू असा विश्वास व्यक्त केला.

केदारला कौतुकाची थाप
कोहलीने केदार जाधव याच्या कामगिरीविषयी कौतुक करीत सांगितले, ‘केदारने या मालिकेत फलंदाजीत अतिशय सातत्यपूर्ण कामगिरी केली आहे. आक्रमक फटकेबाजीबरोबरच एकेरी व दुहेरी धावा काढण्याचे त्याचे तंत्रही उल्लेखनीय आहे.’ केदार जाधव हा संघाला लाभलेला अनमोल हिरा असल्याचे कोहलीने सांगितले. त्याने झटपट खेळून संघाची फलंदाजी अत्यंत मजबूत केली असल्याचेही कोहली म्हणाला.

धोनीचे गिफ्ट अविस्मरणीय
सामन्यानंतर धोनीने कोहलीला चेंडू गिफ्ट म्हणून दिला होता. या विषयावर देखील कोहलीने आनंद व्यक्त केला आहे. तो म्हणाला, हल्लीच्या सामन्यांमध्ये महागडे स्टम्प वापरले जातात, ते आम्हाला घरी घेऊन जाण्याची परवानगी नाही. त्यामुळे एमएस (धोनी)ने मला सामन्यात वापरलेला बॉल गिफ्ट केला. ही तुझी पहिलीच वनडे मालिका आहे, आणि ती तुझ्यासाठी अविस्मरणीय आहे, असं धोनी तो बॉल देताना म्हणाला. ते माझ्यासाठी खूपच स्पेशल होतं. मी त्याच्याकडून त्या बॉलवर स्वाक्षरीपण घेतली, अशी माहिती कोलकाता वन डे नंतर कोहलीने बीसीसीआयशी बोलताना दिली.