एक लाख दहा हजारांचा ऐवज असलेली पर्स चोरट्यांनी लांबवली : जळगावातील घटना

जळगाव : बाजारात खरेदी करण्यासाठी आलेल्या वृध्देकडील रोकडसह दागिन्यांची पर्स चोरट्यांनी लांंबवली. या प्रकरणी जळगाव शहर पोलीस ठाण्यात गुन्हा दाखल करण्यात आला. पर्समध्ये एक लाख दहा हजारांचा ऐवज होता.

शहर पोलिसात गुन्हा दाखल
जळगाव शहरातील रहिवासी नातीचे लग्न असल्याने जिजाबाई वासुदेव कोळी (60, रा.कृष्णा कॉलनी अडावद, ता.चोपडा) या जळगावात आल्या होत्या. जिजाबाई कोळी यांना खरेदी करावयाची असल्याने त्यांना सोमवारी दुपारी तीन वाजेच्या सुमारास त्यांची नातीने दुचाकीवरुन शहरात गांधी मार्केटजवळ सोडले. त्यानंतर गांधी मार्केटमधील एका दुकानात जिजाबाई या साड्या घेण्यासाठी गेल्या असत्या त्यांना त्याठिकाणी त्यांचे नातेवाईक अनिता सुर्यवंशी व सोनाली सुर्यवंशी या दोघे भेटल्या. त्यांच्यासोबत जिजाबाई यांनी साड्या घेतल्या. याचवेळी गांधी मार्केट समोरुन रथ जात असल्याने त्यांच्या दर्शनासाठी जिजाबाई या गांधी मार्केटसमोर रस्त्यावर आल्या. रथाचे दर्शन घेतल्यावर जिजाबाई यांच्यासोबतच्या त्यांच्या नातेवाईक महिला निघून गेल्या. त्यानंतर जिजाबाई ह्या केळी घेण्यासाठी याच परिसरात एका विक्रेत्याकडे गेल्या. केळी विक्रेत्याला पैसे देण्यासाठी जिजाबाई यांनी बॅगमध्ये हात घातला असता, पैसे असलेली छोटी पर्स दिसली नाही. या पर्समध्ये 75 हजारांचा 26 ग्रॅमचा सोन्याचा तुकडा, 15 हजार रुपयांचा 6 ग्रॅमचा सोन्याचा तुकडा व 20 हजार रुपये रोख असा 1 लाख 10 हजारांचा ऐवज होता. परीसरात सर्व शोध घेतला मात्र पर्स मिळून आली नाही. अखेर जिजाबाई कोळी यांनी मंगळवारी सायंकाळी शहर पोलिसात तक्रार दिली. त्यावरुन गुन्हा दाखल करण्यात आला. पुढील तपास पोलीस नाईक किशोर निकुंभ करीत आहेत.