एटीएम ब्लॉक करण्याच्या बहाण्याने जळगावच्या तरुणीला लाखाचा गंडा

जळगाव : हरवलेले एटीएम कार्ड ब्लॉक करण्याबाबत गुगलवर जाऊन संपर्क क्रमांक मिळवणे जळगावच्या तरुणीला चांगलेच महागात पडले. जळगाव शहरातील रचना कॉलनी येथील तरुणीची 90 हजार 545 रुपयांत फसवणूक झाल्याप्रकरणी एमआयडीसी पोलिसात गुन्हा दाखल करण्यात आला.

आयटी कंपनीतील तरुणीची फसवणूक
जुना मेहरुण रोड परीसरातील रचना कॉलनीत दीक्षा आनंदा चौधरी (26) ही तरुणी कुटुंबीयांसह वास्तव्यास आहे. ती पुणे येथे आयटी कंपनीत नोकरीला असून सध्या घरूनच कंपनीचे काम करीत आहे. मंगळवार, 22 फेब्रुवारी रोजी दीक्षा पांडे चौकातील एका बँकेच्या एटीएममध्ये पैसे काढण्यासाठी गेली. या ठिकाणी ती एटीएम कार्ड विसरली मात्र एटीएम कार्ड गहाळ झाल्याचे समोर आल्यानंतर खबरदारी म्हणून दीक्षाने गुगलवरुन कस्टमर केअरचा नंबर मिळवला. त्यावर संपर्क साधला असता संबंधिताने दीक्षा हिला अ‍ॅनी डेस्क नावाचे अ‍ॅप डाऊनलोड करण्यास सांगितले. त्यानंतर डेबिट कार्डचा नंबर व सीवीवी नंबर विचारला. त्यानंतर काही वेळातच दीक्षाच्या मोबाईलवर तिच्या बँक खात्यातून (59 हजार 998) व (30 हजार 547) रुपये काढण्यात आल्याचा मेसेज आला. संबंधिताने एकूण (90 हजार 545) रुपये काढुन घेतले. फसवणूक झाल्याचे लक्षात आल्यावर दीक्षाने एमआयडीसी पोलिसांत तक्रार दिल्यावरून गुन्हा दाखल करण्यात आला. पुढील तपास सहाय्यक पोलिस निरीक्षक प्रमोद कठोरे हे करीत आहेत.