एल्फिन्स्टन रोड’ रेल्वे स्थानकाचे नाव ‘प्रभादेवी’

नागपूर : मुंबईतील ‘एल्फिन्स्टन रोड’ रेल्वे स्थानकाचे नाव ‘प्रभादेवी’ रेल्वे स्थानक असे करण्याबाबत राज्य शासनाच्या परिवहन विभागाने पाठविलेल्या प्रस्तावास केंद्र शासनाने नुकतीच मान्यता दिली होती. आज मध्यरात्रीपासून (18/19 जुलै) याची अंमलबजावणी होणार असून स्थानकावरील फलके, तिकीटावर ‘प्रभादेवी’ असे नाव झळकणार आहे. त्यामुळे गेल्या अनेक वर्षांपासून यासाठी आपण करीत असलेल्या पाठपुराव्याला यश मिळाले आहे, अशी माहिती परिवहन मंत्री दिवाकर रावते यांनी दिली.

केंद्र शासनाच्या गृहविभागाने राज्य शासनाच्या परिवहन विभागाच्या प्रस्तावास नुकतीच मान्यता दिली होती. आता या निर्णयाच्या अंमलबजावणीसाठी रेल्वे विभागाने आदेश जारी केला असून आज मध्यरात्रीपासून (18/19 जुलै) त्याची अंमलबजावणी होणार आहे.

या नव्या निर्णयानुसार युटीएस प्रणालीमध्ये डिजीटल डिस्प्ले फलकावर प्रभादेवी स्थानकाचे नाव PBHD असे दर्शविण्यात येणार आहे.

यासंदर्भात प्रतिक्रीया देताना मंत्री श्री. रावते म्हणाले की, या स्थानकाच्या नावामध्ये बदल व्हावेत ही समस्त मुंबईकरांची तसेच राज्यातील जनतेची भावना होती. 2014 मध्ये राज्यात पुन्हा सत्तेत आल्यानंतर माझ्याकडे कार्यभार असलेल्या परिवहन विभागामार्फत आपण राज्य आणि केंद्र शासनाकडे हा विषय लावून धरला होता. परिवहन विभागामार्फत त्यासाठीचा प्रस्ताव तयार करुन त्यास राज्य मंत्रिमंडळ तसेच विधीमंडळाच्या दोन्ही सभागृहांची मान्यता घेण्यात आली होती. त्यानंतर केंद्र शासनाकडे शिफारस करण्यात आली होती. त्यास केंद्र शासनाने मान्यता दिली, ही निश्चितच स्वागतार्ह बाब आहे, असे ते म्हणाले.

‘एल्फिन्स्टन रोड’ रेल्वे स्थानकाचे नाव ‘प्रभादेवी’ असे करण्याबाबत आपण १९९१ पासून प्रयत्न करीत होतो. अखेर साधारण 27 वर्षांच्या पाठपुराव्यास यश आले असून  या नामबदलाची आता आज मध्यरात्रीपासून अंमलबजावणी होणार आहे. या नामबदलाबाबत समाधान व्यक्त करतानाच मुंबईकरांच्या यासंदर्भातील मागणीस यश मिळाले आहे, असे ते म्हणाले.