कंडोम जाहिरातींच्या निर्णयातही घूमजाव

ठराविक जाहिरातींवरच 6 ते रात्री 10 बंदी

नवी दिल्ली : कंडोमच्या जाहिराती सकाळी 6 ते रात्री दहा वाजताच्या दरम्यान दाखवण्यावर आणलेल्या बंदीवरुन केंद्राने एक पाऊल मागे घेतले आहे. थेट लैंगिक दृश्ये दाखवणार्‍या कंडोमच्या जाहिराती दिवसा प्रक्षेपित करण्यास बंदी असल्याचे स्पष्टीकरण माहिती आणि प्रसारण विभागाने दिले आहे. कोणताही निर्णय विचारपूर्वक घ्यायचाच नाही असे ठरवलेल्या केंद्र सरकारने यापूर्वीही अनेक निर्णयांमध्ये अनेकदा फेरबदल केले आहेत. नोटाबंदी, जीएसटी त्याची मोठी उदाहरणे आहेत. आता कंडोमच्या जाहिरातीवरील बंदीबाबतही टीकेनंतर हाच प्रकार घडला आहे.

माहिती देण्यार्‍या जाहिरातींना परवानगी
कंडोमच्या जाहिराती रात्री 10 ते सकाळी 6 या वेळेतच दाखवाव्यात, असे आदेश केंद्रीय माहिती आणि प्रसारण मंत्रालयाने दिले होते. या जाहिराती या एका विशिष्ट वयोगटातील व्यक्तींसाठी आहेत, त्या लहान मुलांसाठी निरुपयोगी असल्यामुळे विशिष्ट वेळेतच दाखवण्याची सूचना केंद्राने दिली होती. एखाद्या कंडोम ब्रँडच्या प्रमोशनसाठी लैंगिकदृष्ट्या उघड दृश्ये दाखवणार्‍या जाहिरातींना हा आदेश लागू होता. ज्या जाहिरातींतून महिलांना लैंगिक उपभोगाची वस्तू म्हणून दाखवले जात नाही, मात्र सुरक्षित शारीरिक संबंधाची माहिती नागरिकांना दिली जाते, त्या जाहिराती सकाळच्या वेळेत दाखवण्यास आक्षेप नसल्याचे सांगण्यात आले आहे. केंद्राच्या निर्णयाविरोधात एका एनजीओने राजस्थान उच्च न्यायालयात धाव घेतली होती. ही नोटीस जारी करण्यामागील कारणे एनजीओने माहिती आणि प्रसारण मंत्रालयाला विचारली होती.