कम्प्युटर ‘व्हिजन सिंड्रोम’चा धोका वाढतोय?

मुंबई:तुमचे दीर्घकाळ संगणकासमोर बसून राहणे आरोग्यासाठी धोकादायक ठरतंय असं संशोधनाअंती सिद्ध झालंय. बेंगळुरुमधील डॉ. अग्रवाल यांच्या नेत्र रुग्णालयाकडून करण्यात आलेल्या संशोधनातून ही माहिती समोर आली आहे. त्यांनी केलेल्या सर्वेक्षणातील निष्कर्षानुसार, जवळ जवळ ५० ते ६० टक्के लोकांच्या अश्रू तयार करणाऱ्या ग्रंथींवर संगणकाच्या स्क्रीनकडे एकटक पाहत राहल्याने परिणाम होतो आहे. डोळे निरोगी राहण्यासाठी तसंच डोळ्यांची कार्यक्षमता अबाधित राहण्यासाठी डोळे सतत ओलसर राहणं गरजेचं असतं. डोळ्यातील आवश्यक तेवढा ओलसरपणा टिकवण्यासाठी अश्रुग्रंथींमध्ये अखंडीतपणे एक विशिष्ट प्रकारचा द्रव तयार होत असतो. परंतु, ‘कंम्प्युटर व्हिजन सिंड्रोम’मुळे अश्रुग्रंथींमध्ये हा द्रव तयार होण्यासदेखील अडथळा निर्माण होतो. तसेच डोळ्यांमध्ये सारखं पाणी येणे, डोळे चुरचुरणे, मान आणि डोके दुखणे, डोळ्यांची जळजळ होणे अशा अनेक त्रासांना सामोरं जावं लागतं.

‘जेव्हा आपण कोणत्याही स्क्रीनकडे एकटक बघत असतो, त्यावेळी आपण डोळ्यांच्या पापण्या मिटणं विसरून जातो. त्यामुळे डोळ्यांमध्ये सारखं पाणी येण्यास सुरुवात होते. ऑफिसमध्ये एसी असतो, त्यामुळे दमट वातावरण निर्माण झालेले असते. याचा परिणाम हळूहळू आपल्या अश्रुग्रंथींवर होतो. हे डोळ्यांचा आरोग्यासाठी घातक आहे.’ अशी माहिती डॉ. रघू नागाराजू यांनी दिली आहे.

डॉ. अग्रवाल यांच्या नेत्र रुग्णालयाकडून घेण्यात आलेल्या या सर्वेक्षणात संगणावर दिवसाचे ५ ते ६ तास काम करणारे ८०० जण सहभागी झाले होते. डिजिटल स्क्रीनच्या सततच्या वापराचा आरोग्यावर काय परिणाम होतो हे जाणून घेण्यासाठी काही चाचण्या घेण्यात आल्या. त्यातून हा निष्कर्ष समोर आला आहे.