कसोटीच्या क्रमवारीत भारतीय संघ अव्वल स्थानी कायम

दुबई : श्रीलंकेविरुद्धच्या कसोटी मालिकेनंतर जाहीर झालेल्या आयसीसीच्या ताज्या कसोटी क्रमवारीत भारतीय संघाने आपले पहिले स्थान कायम राखले आहे, तर सलामीवीर लोकेश राहुलने कसोटी कारकिर्दीत फलंदाजांच्या यादीत पहिल्यांदाच टॉप टेनमध्ये प्रवेश केला आहे. श्रीलंकेविरूद्धची मालिका 3-0 अशी निर्विवादपणे जिंकल्यावर भारताच्या खात्यात दोन गुणांची वाढ झाली असून 125 अंकासह भारत अव्वल स्थानी कायम आहे. या क्रमवारीत दक्षिण आफ्रिका 110 अंकांसह दुसर्‍या स्थानावर तर 105 अंकांसह इंग्लंड तिसर्‍या स्थानी आहे. भारताचा धडाकेबाज सलामीवीर लोकेश राहुलने या मालिकेत दोन अर्धशतके झळकावताना कसोटीमध्ये सलग 7 अर्धशतके झळकावण्याचा विक्रम केला होता. त्यामुळे या मालिकेआधी फलंदाजांच्या यादीत 11व्या स्थानावर असलेल्या राहुलने आता नवव्या स्थानावर उडी घेतली आहे.

या कामगिरीबरोबरच राहुलने त्याच्या कसोटी कारकीर्दीत सर्वोत्तम स्थान गाठले आहे. राहुलसोबत टॉप टेनमध्ये फलंदाजांच्या यादीत भारताच्या चेतेश्वर पुजारा (4), विराट कोहली (5) आणि अजिंक्य रहाणे (10) यांचा समावेश आहे. राहुलचा जोडीदार शिखर धवननंही शानदार कामगिरीच्या जोरावर 38व्या स्थानावरून 28 व्या स्थानावर झेप घेतली आहे.

फलंदाजांच्या यादीत ऑस्ट्रेलियाचा कर्णधार स्टीव्ह स्मिथ अव्वल स्थानी आहे. गोलंदाजांच्या यादीत रविंद्र जाडेजा पहिल्या स्थानावर तर रविचंद्रन अश्विन तिसर्‍या स्थानावर आहे. अष्टपैलू खेळाडूंच्या यादीत मात्र रवींद्र जडेजाला आपले अव्वल स्थान गमवावे लागले आहे.